مرحبـــــــا شباب اول شي السلام عليكم ورحمه الله وبركاته ,و عشان لا يطول الكلام ادخل بلموضوع على طول : كان عندي مجموعه من الطيور انواع كثيره وكل نوع بقفص خاص ليه , بس كانت حكايه التنظيف كانت شويه صعبه فنصحني صديق وقال ابني مطير كبير(6*5) ( صندقه عندنا هنا بجده) واحط الطيور كلها فيه وهنا بدت المشاكل , راح اعرض مشكله كل نوع من الطيور الي عندي ويريت يريت احد يديني حل او طريقه عشان اقدر احلها , معا اني موفر للطيور افضل اكل ان كان حبوب او طبيعي واعشاش وكل يوم بغير المويه ( الماء) ليهم وفيتامينات وكل شي كل شي , بس اهم شي لاتقولولي افرقهم عن بعض ويالله نبدا :

1_ اول شي بتكلم عن الكناري عندي 7 طيور كناري 4 ذكور ، واحد سوري وواحد بوردر الماني واتنين جلوستر و 3اناث اتنين مقنبره ووحده عاديه , المهم اول مشكله الكناري السوري اصباعه الخلفي معطوف وطالع جهه الاصابع الاماميه فبيصعب عليه انه بيوقف بسهوله على اي شجره او عامود بس ماشاء الله عليه مايسكت شغال مزبوط فيريت اعرف ان كان فيه حل نعدل ليه الاصبع هذا تقولولي ايش هوا , الكناري هذا تزاوج معا وحده من الاناث اول مره باضت وتاني مره وتالت مره بس مابيفقص البيض وبتسيب العش , وبرضه بيتضارب هوا والبوردر كل يوم مش عارف ليه , اما الاتنين الجلوستر فواحد بيغرد نص تغريده والتناي ساكت مدري ليه , وكمان وحده من الاناث مافي اي كناري حاول يقرب منها , كفايه كدا في الكناري نشوف مشكله طير تاني .....................

2_عندي حسون كان شكله وصوته مرررررررره جنان لين ماجبت ليه انثى وياريتني ماجبتها قلبت حاله صار شكله باهت وكانه مغبر ومصلع وهيا الغبرا كمان وماصر بيغرد وحركاته قلت ولا تزاوج فيريت الاقي حل عند احد منكم لانه كدا مشكله, ماطولنا في الحسون نشوف غيره ...........

3_اشتريت جوز جولديان فينش واحد راسه لونه احمر والتاني برتقالي بـ 350 ريال والراجل الي باعني اياهم قلي لو لقيتهم ارخص من كدا ردهم لغايه دحين والكلام حلو , بس للاسف اكتشفت ان الاتنين ذكور ليهم نفس الصوت والحركات ومابيجلسوا معا بعض , فيريت لو احد يقلي كيف افرق بين الذكر والانثى لاني ناوي اشتري جوز اناث , والله يسامح البياع راح يخسرني تاني , وهذي مشكله الجولديان , نشوف غيره ...........

4_الزيبرا ودول حكايتهم حكايه كانوا 3 اجواز الان عددهم وصل لل 30 في كل عش الاقي بيض ليهم المشكله ساعات بيدخل طير زيبرا تاني بعش يكون فيه فراخ وبيسحبهم لبرا وبيوقعوا على الارض وبيموتوا معا ان فيه فوق ال 40 عش فكيف اربيهم دول ............................

5_ستروبيري فينش والله يجماعه وللمعلوميه الذكر والانثى بيطلعوا اصوات مررررررررره حلو بس عيبها انها ضعيفه مشكلتهم ان الانثى بتبيض بس برضه مابيفقص البيض معا اني مو مقصر معاهم في شي ..........

6_ ال spice finch عرفتوها الي لونها بني محروق بس هنا عندنا بلسعوديه يصبغوها الوان اشتريت جوز وطلعوا الاتنين ذكور الاتنين بيطلعوا نفس النغمه وحاولت اجيب ليهم اناث بس ماعرفت اشتريت طيور صغيره تانيه برضه لونها بني بس ماطلعت اناث طلعت فصيله تانيه وتكاثروا وصارو 9 , كيف افرق بين الذكر ولانثى وشكرا ......... لسى خلونا نكمل ...

7_طيور الهويداه عارفينها الي ليها ريشتين طوال في ذيلها اشتريت جوز محترم وكانوا ميه ميه هما اصواتهم غبيه بس شكلهم وعرض الغزل للذكر مرررررره حلو , المشكله ان الريشتين الي بلذكر وقعوا ولونه بهت شويه وصارت الانثى كل يوم بتضبها خناقه معاه ؟؟؟؟؟؟؟؟؟؟؟؟؟؟؟.........

8_وكمان جوز جانكو عارفينهم الي لونهم رصاصي ليهم عندي سنه واخيرا الذكر بدا يغرد هوا مو تغريد بس صوت حلو بس ليش مو راضي يتزاوج ؟؟؟؟؟؟؟؟.......

9_واخيرا وليس باخر كمان موجود عندي جوز يمام ماسي وساعات بيسموه حمام صيني المهم عندنا هنا بجده بيسموه القمري وفيه كمان ذكر مذبوح ابو حلق احمر دا وليا سنه ادورله على انثى مو لاقي وجوز زيبرا فينش وماشاء الله عليهم باضت الانثى ومستني الفراخ , وفيه جوز طيور الي باعني اياهم قلي اسمها كناري باكستاني وقلي بيغرد الذكر بس لسى ماسمعت شي منهم معا اني اشوف زي هذي الطيور عندنا بوادي فاطمه تبنى عشها على شكل كوره نازله من غصن بس مدري عنه بيقولواه امشي ورا الكدا ب.., وجوز طيور لونها اصفر على اخضر وجهها فيه خطين من فوق المفروض برضه انها تغرد بس مابسمع شي , ودمتم....


معليش حبايبي طولت بس والله الشغلات هذي صارت لي زي الهم الي بيشغلني كل يوم وبصراحه احب طيوري والله بشكل ماتتصورونه وكل واحد فيهم ليه حكايه عزيزه على قلبي فما ابغى اشوفهم بلشكل دا , انتوا لو شفتوهم كلهم معا بعض كيف والله حاجه خياليه , فياريت تساعدوني باي معلومه او نصيحه تخليني مااخسر الطيور وشكرا .........

حبيبكم وليد