شراء طيور البوم

[Wael Bek]

السلام عليكم
حد يعرف منين اقدر اشتري فرخ بومة من اي نوع في مصر؟؟؟؟
و هل حد عنده خبرة في تربيتها؟؟؟؟

[روايات]

وعليكم السلام يا اخ وائل
اهلا وسهلا بيك في المنتدي ..الافضل وضع سؤالك في القسم الخاص بالتسوق عشان الافاده
غريبه انك عايز تشتري بومه هو في اشكال حلوه منها بس ما سمعت ان في حد فكر يربيها ...خلاص انت تبقي اول واحد يجرب ونستفيد من التجربه ههههههه...بس من الافضل انك تشوف معلومات عنها وعن تربيتها قبل ما تشتريها
عموما شوف سوق السيده عائشه يوم الجمعه و الافضل انك تروح من بدري
وقولنا لو اشتريت البومه وايه سعرها وياريت صوره ليها ...من باب الفضول والمعرفه

[Wael Bek]

شكرا اخ روايات
بيعجبني في البومة انها هادئة و شكلها حلو و مختلف عن باقي الطيور و في ناس بتربيها في الكويت و السعودية و قليل جدا في مصر.
ممكن تشوف الفيديو ده عن البوم:
https://www.youtube.com/watch?v=oKVRrC2HcFs

[Wael Bek]

هو انا برده عايز انقل الموضوع لقسم التسوق بس مش عارف منين،،، قاعد ادور و مش لاقي

[eddis]

السلام عليكم
مرحبا بك اخي الفاضل بين اهلك وناسك وعائلتك الكبيرة ....

. . . . .

ان شاء الله تجد ضالتك وتحصل علي بومة لكن ماذا تاكل ؟ حقيقة اول مرة تخطر علي بالي هته الفكرة و لاني ربيت الكثير من الطيور الجارحة و المائية اما البوم فلا ....

[Wael Bek]

و عليكم السلام Eddis
قريت في موقع اجنبي ان البوم بياكل لحم طبيعي يعني مش مصنع ( زي البرجر او السجق) و مينفعش ياكل فاكهة مثلا لانه مش هيقدر يستفاد بالمكونات الغذائية اللي فيها، يعني لحم و بس. في ناس بيجيبوا كتاكيت و يخلوا البومه تاكلهم بس الفكرة دي مش كويسة .

[روايات]

ايه اخر قرار يا اخ وائل بالنسبه لشراء البومه ؟؟
انا شفت الفيديو وهي فعلا شكلها جميل بس في بعض النقط اللي لازم تحطها في بالك قبل ما تشتريها
مثلا
1 - توفير مساحه للطيران ...ماهو مش حتفضل محبوسه في القفص
2 - زي ما انت قلت ان طعامها كتاكيت او فئران او حشرات او لحوم ...مش عارفه حتكون عندك نفس تشتري الحاجات دي ازاي
3 - لا قدر الله وحصل لها شئ هل في طبيب بيطري قريب ممكن يعالجها وخصوصا ان تربيتها مش منتشره اوي
4 - يفضل انها تكون صغيره عشان تقدر تدربها وتكون اليفه عشان تعرف تتعامل معاها
5 - فرضا حتسافر كام يوم هل في حد تعرفه ممكن يتقبل انه يقوم برعايتها بدون خوف منها ( دي مشكله بعاني منها لما اسافر ومش لاقيه حد يرعي الارنب و الحمامه اللي عندي ...تخيل بيخافو منهم فما بالك بومه )
5 - ده السؤال الاهم ...اهل البيت موافقين علي انك تربي بومه في البيت ...انت عارف تفكير الناس عنها انها شؤم ومش كويسه حتي لو كانت بومه من الالماس ( لو الماس ممكن اخدها طبعا )
اكيد في حاجات تانيه ممكن تفكر فيها قبل ما تعمل الخطوه دي وخصوصالسه معاك وقت قبل يوم الجمعه لو ناوي تروح السوق ...
من الاخر فكر في كل التفاصيل لانها روح وحتكون مسئوله منك ترعاها

[Wael Bek]

انا فكرت في كل اللي قولتيه و دورت علي كل حاجه عايز اعرفها، سألت اهلي في البيت - و بعد محاولات لاقناعهم - لقيتهم مش موافقين خالص.
البومه اللي كنت عايزها اسمها بومة قزمة او pygmy owl بتتباع في سوق السيدة عائشة الفرخ منها بحوالي 100 جنية و السعر ده كان سنة 2014.

[eddis]

السلام عليكم
ما شاء الله الاخت روايات اثارت نقاط حساسة جدا والجميل انك عامل حسابك ...
اسكن في الريف وتكثر انواع منها عندنا و منها من تهاجم الحساسين او الكناري الذي نتركه خارجا في الليل ..وفكرتي عكس فكرتك تماما لو وجدتها قرب منزلي لطردتها شر طرد .
ان شاء الله تجد ما تريد وتسعد بيها...

[روايات]

شفت صور للبومه اللي انت عايزها يا اخ خالد ومعاك حق شكلها حلو و لطيف جدا
بس بعد ما عرفت ان الاهل مش موافقين نصيحه من اخت تمثل الجانب النسائي بلااااااش تعمل حاجه والاهل مش موافقين و خصوصا لو كانت الوالده... والا حتشوف مشاكل لا حصر لها تخليك تكره الفكره نفسها وممكن تلاقي نفسك مطرود انت و الطائر من البيت
الاحسن كل ما تشتاق للطائر روح اتفرج عليه في السوق و اتصور معاه
ممكن تشتري سمك زينه احسن للكل منه شكله حلو وينفع في وقت زياره مفاجئه انه يتعمل احلي صينيه سمك زينه في الفرن و بالهنا و الشفا هههههههههههه
بهزر طبعا بس يفضل انك تدرس الفكره من كل النواحي قبل التنفيذ وخصوصا موافقه و رضاالاهل دي اهم من كل شئ