يشرفني أن أنضم إلى هذا المنتدى الذي أعتبره موسوعه ومرجع علمي لكل من أراد أن ينضم إلى هواة تربية الطيور ومهما قلت فشهادتي في المنتدى مجروحة.
إشتريت يوم الجمعة رمادي أفريقي بعد ما لفيت سوق الطيور فوق ساعتين وأنا أدور على ببغاء ما كنت مهتم سواء وحشي أو أليف بقدر ما كنت مهت بالصحة الجسمية للطائر.
وزي ما أنت عارف كل واحد يمدح بضاعته ويذم بضاعة اللي جنبه وفي النهاية استوقفني رمادي أفريقي محطوط داخل قفص لا تتعدى مساحته 30سم*40سم
وكسر خاطري والله وسألت راعي المحل عنه طلع يبيع مستلزمات صقور ولا عنده أي خلفيه عن هالطير سواء العمر أو شهادة صحية وخلافة المهم قررت أشتريه باللي يكون مع إنه يجعر وصوته عالي وراعي المحل يقول هذا وحشي وما يتربى وشريته منه ب 700 درهم يبي الفكه منه.
ما أطول عليكم رحت وشريت له قفص كبير وشريت له حبوب من النوع الفاخر ورحت للبيت وأنا متأكد من إني محتاج من أسبوعين لشهر علشان يتعود علي أنا والمدام طبعا أول ما جبته وديته للمطبخ علشان أضبط القفص شوي وطلعت فول سوداني من الكيس وأعطيته إياها وأخذها من إيدي على طول وقام ياكلها وعطيته الثانية وما فيه مشاكل قصيت له ربع تفاحة وأخذها وقام يمزمز فيها شوي وديته للصالون اللي غالبا ما نكون متواجدين فيه علشان يكون معانا طوال اليوم وديته المهم بديت اصفر وانا جنبه واطالع مباشرة في عينه واتكلم معاه تقريبا ساعتين وانا جالس جنبه انا والمدام ومره انا اكلمه ومره الحرمه المهم اخترت له زاويه من الصالون قريبه مننا مرة والحبيب اشتغل لك تصفير وتغريد على باله بلبل قلت الحمد لله بداية خير وصرت أصفر ويقلد تصفيري طبعا سميته بوبي وكل شوي أناديه بإسمه بس ماني مستعجل على كلامه الحين المهم على الساعة 9.30 بالليل قلت ابفتح باب القفص وبادخل يدي عليه مو علشان امسكه بس علشان أجس النبض قام يجعر بس بصوت خفيف وبالكاد ينسمع مو زي ماكان بالمحل ويهوش على يدي كأنه بيعضني بس ما بعدتها وما بينت له إني خايف منه المهم إنه تقريبا 3 دقايق ووقف الجعير بس الى الحين ما حاولت ابدا معاه اي نوع من انواع التدريب قلت اخليه اسبوع او اسبوعين الين يتعود على المكان وعلى القفص الجديدوهذا الكلام كله في أول يوم وسيت معاه نفس الشي امس واليوم وما شاء الله يبدع بالأصوات حتى صوت جرو يقلد.
هذي كانت اول تجربه لي مع الرمادي الأفريقي وكما قرأت في هذا المنتدى الرائع عن تحديد عمر الطائر أعتقد أنه لم يتعدى 18 شهر ولكم الصور في الأسفل للتدقيق وإعلامي برأيكم
الحين عندي كم إستفسار لعمالقة وخبراء هذا المنتدى الرائع وأعتذر عن الإطالة لكن قلت التفصيل أحسن للوصول لأفضل النتائج:
1-كيف أفرق بين حك التصفيف للريش لأن من المعلوم أ الببغاوات تحب تصفيف ريشها دائما ولكن كيف أفرق بينه وبين الحكة لوجود حشرات او حساسية.
2- متى انسب وقت اقدر ابدا مع طيري التدريب على الوقوف على اليد والمسح على الرأس اقصد بعد اسبوع او اسبوعين او شهر.
3- انا قريت عن طريقة التمسيد وان شاء الله لن أستعملها ولو إستغرقني سنين من الإنتظار .
4- ألاحظ أنه يدخل أظفره في فتحة الأنف لحكها ولكن ليس بإستمرار فهل هذا طبيعي.
5- ما معنى إصدار صوت يشبه الطقطقه عندما أقترب منه علما بأن الجعير إنقطع تقريبا وليس مزعجا.
6- آسف على الإطاله ولكن أتمنى أن تنيروني بنصائحكم الغالية ولكم مني كل التقدير والإحترام وهذي بعض الصور
















