موضوع عجبني (تدريب البادجي ( طريقة مجربة و ناجحة جدا) )

[rafa almegrab]

تدريب البادجي ( طريقة مجربة و ناجحة جدا)

--------------------------------------------------------------------------------

السلام عليكم و رحمة الله و بركاته

البادجي هو الطائر الإسترالي و معروف في دول الخليج بإسم طائر الحب . البادجي بعكس اعتقاد الكثير من الناس ، ليس عصفور عادي مثل الكناري و غيرها من الطيور المستحيل تدريبها ، لكنه ببغاء صغير و ممكن جدا انه يتعلم كلمات معدودة و لكن في حالات التدريب المكثف و عدم وجد طيور اخري معه .

اذا كنت من محبي البغبغانات و نفسك تشتري واحد لكن اسعارها خيالية بالنسبة لك ، او عندك اطفال نفسهم في طيور و متحبش تبهدل البيت :d ، او بتحب الطيور بس بتخاف من الكبير منها ، يبقي مفيش غير البادجي ينفعك :d


البادجي طائر صغير الحجم و ألوانه زاهية و صوته جميل

و يوجد منه انواع منها البادجي العادي و الإنجليزي ( هو نفس النوع و لكن جسمه كبير و اضخم من الإسترالي المعروف ) و يوجد البادجي ابو شوشة ( ريش الراس طويل و عامل زي الشوشة :d )

مش عايزة ادخل في تفاصيل كتير عن الطائر دلوقتي ، خلينا نركز علي التدريب في الموضوع ده و اوعدكم بموضوع مفصل عن الإسترالي يجمع كل ناحية عن حياته و نشأته ان شاء الله

اكرر هذه الطريقة ، طريقتي في تدريب طيوري و الحمد لله الي الأن دربت 3 بادجي منهم انثتين تزاوجوا و لا يزالوا مدربين ، و الثالث ذكر استرالي اسمه تيكي شديد الإرتباط بي الحمد لله ، لو اختلف معايا حد في الطريقة اقول له ( الإختلاف في الرأي لا يفسد للود قضية )

أولا العمر المناسب عشان تجيب طائر استرالي و تدربه ، هو عمر شهر ، و الطائر صغير و بدأ يأكل لوحده و يعتمد علي نفسه

تجيب الطائر اللي يعجبك و ابتعد عن المريض خالص و اللي عنده نقص في الأملاح و الفيتامينات ، عصفوري تيكي كان ضعيف و اخد مجهود كبير حتي يتعافي ، الأحسن تشتري الصحي

اول ما تجيب الطائر سيبه يومين بس و حط له اكل و مية من غير ما تحاول تمسكه ، و خليك معاه اطول وقت ممكن ، امضي وقتك كله امامه و لاحظه و كلمه

في اليوم الثالث يبدأ الشغل :d

في الصباح الباكر اول ما يصحي من النوم حيكون جعان و عايز ياكل.... من الليلة اللي قبلها شيل الأكل و المية من عنده

و لما يصحي طلعه برة القفص و شيل القفص من قدامه خالص ، في غرفة تانية عشان ميهربش عليه

و جيب الأكل في ايدك وحط شوية صغيرة و قربها منه ، لو هرب منك ، متمسكهوش بالعافية ، مع ان الطير في العمر ده بيطير بالعافية و بيطير مسافة قصيرة جدا .. مش محتاج تروعه و تخوفه و تمسكه

خلي الاكل قدامه في ايدك و هو حيجي و يأكل منها

الطيور في العمر ده مش بتعرف تشرب لوحدها اوي لدرجة انه يتهيأ لك انه عنده جفاف ! :d

ابقي بلل اصبعك في المية و حطها في الحبوب و خليه يلتقط الحب من اصبعك و لو عايز تشربه ... بلل اصبعك و خليه يلحس المية منه .. حيشرب نقطة او اتنين بالكتير بعد كده ينفض المية و يرفض الشرب ... متغصبش عليه

الطير في العمر ده بيبقي لسه محتاج لحنان الأم و غير متعود علي الحياة بره العش

و كل ما تيجي تشيله حتلاحظ انه بيجري علي الجاكت او اي حته مظلمة في هدومك و يدفس نفسه فيها عشان ينام :d

خليه ينام و متقلقش عليه ... و خليه يحس بالدفء معك ... بالطريقة دي حيبدأ خطوات ارتباطه بيك و يتعود عليك سريعا

ممكن جدا تخلي الطير طليق في البيت من غير قفص

جيب شجرة زينة مثلا صناعية .... او ترابيزة صغيرة و حط عليها اطباق الأكل و المية بتاعته و الألعاب

هو حيتعود علي المكان و يفضل فيه

و ممكن تشتري استاند البغبغانات و يعيش عليه ، بس لازم تقص له ريش الجناحات عشان ميطيرش بعيد و يتأذي

داوم علي تأكيله من يدك و من و هو صغير حك له رأسه ... الطيور بتحب الحركة دي جدا ... خصوصا لو كانت وحيدة حتلاحظ انه يلفت انتباهك و ينفش ريش وشه و يستني تحك له رأسه

تدريب الإسترالي من عمر شهر يأخد معاك شهر بالضبط ... و بعد كده حتنعم باحلي صديق يجري وراك و يستناك لما ترجع من الشغل عشان تلاعبه و يجري عليك لما تأكل و يخطف الأكل منك :d
الشجاع من يخلق من اليأس امل لان الياس فيه طعم الموت و لان الشجاعة معني الحياة علي الجارم

[bad boy]

اولا اهلا وسهلا بك بيننا في المنتدى

ثانيا شكرا على الموضوع الرائع الي قدمته لينا


تحياتي

[maged ramses kamil]

اخى العزيز/
موضوع شيق وجميل والاجمل هو تربية الطائر نفسه على فكرة طريقتك هى نفس الطريقة اللى بربى بيها البادجى وانى اتفق فى كل ما تقول بس مشكلتى الايام ده هى الوقت والبادجى اهم شىء فى تربيته هو الوقت وانتظر منك مواضيع اخرى واتمنى لو تكتب بعض اختباراتك فى باب تجارب السادة الاعضاء فى تربية البادجى

[WAEL_SAMY1]

ما هو الوقت الذى اذا قديتو معاه اكون فعلاًً بدائة اصحبو كام ساعه فى اليوم

[muhammed_farouk]

مشكور اخى الكريم على الموضوع الجميل والمعلومات الرائعة جزاك اللة كل خير.

[king5stars]

شكرا ليكي على الموضوع
واهلا بيك في منتدانا الغالي

تحياتي

[seaf]

السلام عليكم ورحمة الله وبركاته
مشكور اخي موضوع رائع

تحياتي
اخوكم seaf

[خالد عبدالله عبدالكريم]

السلام عليكم اخي يعطيك العافية علي الموضوع

[بشار موفق]

مشكور على الموضوع الشيق والجميل

[م/أحمد نصر]

السلام عليكم ورحمة الله وبركاتة
الأخ العزيز/rafa

أشكرك علي هذا الموضوع الجميل وأيضا موضوع حكم التربية
وفي أنتظار مواضيعك الجديدة.

شكرااا.....وبالتوفيق