هام جدا للمناقشة

[medo2007]

اعزائى اعضاء المنتدى
السلام عليكم ورحمة الله وبركاتة
كنت اود ان اطرح سؤال عليكم واود المشاركة والأستقرار على راى الا وهو سعر الطيور وهل النزول بالأسعار افضل ام التمسك بالاسعار وعدم التفريط فى الأسعار.
وسوف اسرد على سيادتكم راى الشخصى
والله فى راى الشخصى هو عدم النزول بالاسعار نهائيا وذلك لما يتكبدة المربى من خسائر فادحة
وذلك حتى يحتفظ العصفور بقيمتة ويستفاد المربى ايضا وارجوا منكم عدم فهمى خطا
وعلى فكرة هو موضوع نسبة وتناسب وهى برضة مراحل انتقالية لان المشترى سوف ياتى اليوم ليبيع فيه وسوف يقول مثل مااقولة الان
ومما دفعنى للكتابة فى هذا الموضوع موقفين حدثم لى فى وقت واحد
الموقف الأول
كنت ابيع زوج الزغاليل الكوبالت بـ 250 للزوج ثم بعت الـ 3 فرود بـ 200 جم وهذا معقول ولكن ليس من المعقول ان سعر زوج الكوبلت الكبير اليوم لايتعدى 100 جم محدش يستغرب دة سعرة من يومين اشتريت انثى كوبلت سن 9 شهور بـ 45 جم ولونها ممتاز جدا حد يقولى ماهذا ولماذا ؟
الموقف الثانى
عجبنى البادجى الأنجليزى من فترة فقررت ان اشترى واربية لما يتمتع به من جمال وعند قيامى بالشراء وجدت جميع الهواة والمربيين متمسكين بالأسعار القديمة وعند سؤال احد الهواة عن الأسعار المرتفعة قال لى انا افضل انى اخليهم عندى ولا هنزل جنية اللى هيبيع هو اللى هيخسر ومحدش هيبيع ونجحت فكرتهم جدا والدليل على ذلك انى اشتريت فرد بـ 700 جم واخر بـ 500 ودى اسعار محدش كان يسمع عنها فى بداية الموسم الذى كانت اقصى قطعة فية لاتتعدى 200 جم

يااخوانى فى راى الشخصى ان حميع المربيين والهواة يتمسكوا بالأسعار مهما كانت الظروف لانها ثروة لا يجب التفريط فيها وبهذة الطريقة سوف نشجع اكثر الناس للدخول فى هذة الهواية حتى على سبيل مشروع كبير مربح يدر دخل للشباب عالى
قلت راى ومستنى رايكم
وبالنسبة للجدد سوف ياتى اليوم الذى تبيعون فية وتقولون مااقولة
وشكرا

[legend55555]

والله يا استاذ ميدو انا موافقك في الراي بس بصراحه انا اشتريت عصافير كتير في الايام ده ايام الرخص ومعنديش مانع مثلاً اني ابيعها برخص برده زي ما أنامشتريها في حالة اني انا عايز ابعها
فمش معقوله حد بعد ما اشتري ( مثلاً )مني جوز كوبالت ب100 زي ما حضرتك قولت هيرضي يشتري هو ولا اي حد يعرفه وقاله علي سعر الجوز فرد ب100 جنيه حتي لو ايه
وبالنسبه للانجليزي يعتبر من اكثر الانواع اللي سعرها متأثرش اوي بتغيرات الاسعار عشان معظمها كان استيراد وعشان الاستيراد ممنوع نهائيًا طبيعي ان السعر يفضل عالي عشان محدش هيعرف يشتري غير من اللي عندهم من الاول
غير ان الانجليزي اللي بنفرخه هنا في مصر مستواه بيبقي اقل من المستوي الاهالي يعني اللي عايز حاجه بيور لازم تكون بتاعة بره وده طبعاً بقت عمله نادره نسبياً
وعلي فكره كل الاعضاء موافقينك في الراي ده اكيد بس وقت محد يحب يبيع فيهم حاجه عشان مضطر انه يبعها نظراً لاي ظروف خاصه بيه (لاقدر الله) هيبعها بارخص الاسعار وبجد ده حقيقه
غير مظنش ان الاعضاء هيرضوا يشتروا من بعض طالما اسعارهم غاليه بالنسبه لبعض بعضهم هيفضل يشتري من بره لفروق الاسعار طبعاً وممكن يقول فرق السعر ده انا بنصفه اخلي الفرد ده احسن من اي فرد تاني

[ahmedabutaleb]

بص يااخ احمد دة سوق يعنى عرض وطلب وزى ما الاستاذ محمد قال لو ان احد الهواة عارض زوج ب 200 وفى السوق ب 100 فطبعا هيشترى من السوق اكيد وطبعا اللى بيبيع حاجة اكيد بيبعها لسبب قهرى لان مش هيستغنى عن حاجة هوا بيربيها من كام سشر او بعض الاحيان سنة او اكتتر الا لسبب ضرورى يعنى لازم يبيعها فلللازم يلتزم بسعر السوق ومعلش اعضاء المنتدى لا يمثلوا نسبة عالية فى السوق تستطيع ان تتحكم فى الاسعار فسعر السوق سيبقى للاغلبية اما الذين يبيعون لشراء انواع اخرى فاعتقد ان نزول الاسعار فى مصلحتهم لانهم سوف يشتروا بالسعر الجديد المنخفض وسيدفع اقل فعلى سيبل المثال
واحد سيبيع زوج ب 300 ليشترى زوج ب 400 فسيدفع 100 للبدل
فى حالة نزول الاسعار اصصبح الزوج اوب 300 ب 150 مثلا فسيصبح ابو 400 ب 200 فعندها سيدفع فقط 50 جنية للبدل
اذن النزول فى صالح البائع والمشترى طالما انة سيستبدل ازاوج اما فى حالةانة محتاج للفلوس فسيخسر فعلا ولكن ما باليد حيلة حيث ان كما قلت لا يستطيع اعضاء المنتدى التحكم فى اسعار السوق لتمثيلهم نسبة صغيرة من اجمالى الهواة

[زين الدين]

السلام عليكم

فيه مثل بيقول الخساره القريبه ولا المكسب البعيد
بمعنى بيع اى انتاج طلعلك وسيب منهم اللى محتاجه
وبيعهم بسعر انهاردا

بمعنى

جوز الفشر زمان قبل انفلونزا الطيور
وصل الى 70 جنيه
انهاردا سعره
من 15 الى 20 جنيه
فبيعه ايضا
ولو وصل 5 جنيه الجوز
بيع ايضا
مثال
انتاج الدوره عندى فى الفشر
حوالى 300 جوز من الزغاليل
فى ثلاث دورات مثلا
= 900 جوز فى السنه
لو بعته بـــــ 5 جنيه انا اللى كسبان
لان 900 جوز زغاليل كلفتهم بكام
ولو السوق لا يقبل بيع زغاليل
فى الوقت ده

اطيرهم
فى السماء
وانا اللى كسبان

ولكن الخساره
فى بيع الطيور
كلها
لانك بذلك انهيت الغيه بكاملها
ولا تعرف رزقق فين
ومع بيعك الزعاليل بثمنهم تاتى بثمن الكلفه
واعتبر نفسك لا تكسب جنيه واحد
واحسبها
انك بتستمتع
بغيتك

[king of birds]

انا شايف ان كل واحد لازم يتمسك بالاسعار القديمة لان لو كل واحد نزل بعد كده مش هيجيب ثمن الاكل بس ساعات الواحد ممكن تحصله ظروف فا مع اول سعر بيجيلوه بيبيع مهو مزنؤ بس بس محديش يزعل منى الكلام ده عمره ما هينفع لان مهما الناس عملوا الحكاية ديه هيبؤ شيوية قولياين و سعر السوق هو الى هيمشى بس ممكن تنفع بين العضاء هنا و بعضها و برضه مش مضمونة لان انا دلوقتى لو اشتريت من اى عضو جوز ب 400 و ثمنه فى السوق 200 لما يشتغل و جاب زغاليل و محديش من المنتدى كان محتاجه لما اجى ابيعها مش هتجيب اكتر من 50 فا هى كما قال الجميع عرض و طلب ذى سوق العملة

[haytham]

السلام عليكم و رحمة الله و بركاتة....................

أخوانى الكرام ..................

أنا أرى و الله أعلم أن المسألة كما ذكر الاخوة هى فى الاول و الأخر مسألة عرض و طلب , و هذا فى المقام الأول سوق و كل هاوى له الحق فى طلب السعر الذى يراة مناسبا لطيورة , و لكن بالنسبة للسعر فأرى أن لا يقوم الهاوى بالمغالاة فى الأسعار عن السوق بشكل ملحوظ حتى و لو كانت الطيور التى يقتنيها مضمونة 100% , فعلى الهاوى ان يتقيد نوعا ما بسعر السوق , بمعنى , زوج اللاتينى روز فى السوق الأن يتراوح سعرة من 70 الى 80 جنية , و هى طبعا أزواج غير مضمونة , فعند اذن سأتجهه للهاوى حتى أشترى زوج مضمون و بسعر أغلى , و لكن سعر الهاوى لا يجب أن يكون مغالاة فيه , بمعنى أن لا اجد الهاوى يطلب فى الزوج مثلا 150 أو 160 جنية بحجة انه زوج مضمون , و لكن فى هذه الحالة مثلا اظن السعر المناسب هو 110 أو 120 جنية كحد اقصى , و هكذا , فأنا أرى أنه لا يجب التمسك بالأسعار القديمة , و ذلك لآنه لو تم هذا فسيتم حدوث رقود لعملية البيع و الشراء بين الهواة بنسبة كبيرة جدا , فهل يعقل أن أشترى زوج سعرة فى السوق مثلا 100 جنية من هاوى بسعر 300 جنية حتى و لو كان مضمون و شغال , أكيد لا طبعا ......................

و الدليل على كلامى هذا أنى لسه بايع بفضل الله جوز لاتينى روز معه 4 زغاليل بالقفص و العش ب 160 جنية , فهل يعتبر هذه سعرهم ؟ اكيد لا , لكن انا مضطر للبيع , و علشان أبيع لازم أتقيد بسعر السوق نوعا ما , فهل لو طلبت فيهم السعر القديم كانوا هيتباعوا ؟ , أكيد لا طبعا .........

هذا هو رأيى و الله تعالى أعلى و أعلم .................

[legend55555]

اظن يا استاذ ميدو ده كان رد شبه متوقع من الاعضاء وفعلا كهوايه مش تجاره
الاسعار ده مصلحه للهواه وده بسبب اني ممكن اشتري انواع كتير بمبلغ قليل
وبكده ابقي اشبعت هوايتي وفي حدود امكانياتي
وبصراحه انا اشتريت حوالي 11 زوج من الشوش من حوالي اربع شهور عشان اشغلهم في مجموعه ال 11 زوج ممكن يكون بكتيره الزوج ب 40 جنيه انا شاريهم شبابات
يعني كلهم 440 جنيه واظن ده كان بكتيره ثمن جوزين بالاسعار القديمه
وانا ايام مكانت العصافير غاليه كنت بشتري الذكور شوشه والاناث عاديه او بنت شوش بس عاديه عشان الاسعار طبعا وعشان لو مشتغلوش مخسرش كتير
واظن خير دليل عن ان الاسعار ده مش فرقه اوي مع الهواه
استاذ احمد ابو طالب عايز يبيع الفيشرات والروز عشان يشتري نوع تاني فبالنسبه ليه مصلحه عشان الاسعار رخيصه واظن انه قال حالته في مثال بسيط

[XP_2600]

انا رأي ان الموضوع ليس ثابت فأنت رجل محاسب و تعرف اكثر مني قوانين العرض و الطلب و انه نظريا السلعة التي تحصل علي اعلي عرض في ظل المنافسة يصل ثمنها الي الصفر, و الطيور يزيد عددها و يزيزد عدد المربيين و الميزة التنافسية للمربي قد تكون السعر, ولهذا يجب ان نتوقع انخفاض الاسعار مع زيادة عدد المربيين والطيور , يجب فقط علينا عدم بخس الناس أشيائهم و في نفس الوقت عدم المغالاة هناك نقطة اخيرة احب الاشارة اليها و هي ان الهواة يجب ان توفر الالوان العادية للمربين الغير قادريين بأسعار رخيصة لان هذه مخلوقات الله و من حق اي شخص يحبها ان يحصل عليها, فما المانع ان نري طيور الحب الخضراء تباع بنفس اسعار البادجي او حتي أقل ؟ والله المستعان.

[medo2007]

اخوانى اعضاء المنتدى
اشكركم لردودكم غلى موضوعى اولا
وثانيا
ياجماعة انا مازلت بشترى طيور لانى برتب بمشيئة الله حاجة كدة فى راسى انشاء الله هتعرفوها قريب وبالرغم من كدة بايد فكرة التمسك بالأسعار القديمة والبعض منكم لم يفهم كلامى ياجماعة طبيعى لما المربى هيتمسك بالسعر سعر السوق هيرتفع يعنى مش هيبقى فية فرق بين السوق او الهاوى سوى حاجة بسيطة
طيب دلوقتى ياجماعة انا اشتريت زوج زغاليل البينو روز او كريمى اينو علشان اخى محمد امام ميزعلش بكام 1800 جم لو الزوج دة مات خسرت انا 1800 جم تقدرو تقولولى المربى بيكسب كام 1800 جم من عصافيرة لما يموتله زوج بالسعر دة خلاف مصاريف التربية من اكل وفيتامينات ورعاية طبية
على فكرة محدش يقول انه بيربى للتربية فقط لانة لو ربى للتربية فقط هيجيلة وقت هيزهق ويتركها لان رعاية العصافير تحتاج مجهود جبار وبالذات مع الأعداد الكبيرة وهيترك الهواية ويرجعلها تانى وهيفضل كدة اما لو ادرت علية عائد منة هواية ومنة زيادة لدخل فى ظل عدم توافر فرص العمل ممكن يبقى مشروع كبير وناجح بالعكس كلامى دة يشجع الناس انها تربى اكتر وتدخل الهواية اكتر حتى ولو فى الاول للربح مين فيكم بيربى للهواية فقط
طيب خد يقولى مزارع السعودية بتكاليفهم الضخمة ماشاء الله عليهم اصحابهاا بيربوا للهواية فقط ولا مشروع كبير بيدر دخل كبير عليهم واليوم السعودية بها اكبر المزارع الموجودة فى العالم كلة فى تربية البغبغاوات
والدليل على كلامى لو شاب مثلا لايجد فرصة عمل وملهوش فى الطيور وواحد اقترح علية تربية الطيور للهواية هيربى
ولا لو بص وجد انه لو اشترى مجموعة من الطيور والطيور دى بمشيئة الله ممكن تدر علية دخل وبص لها كمشروع يعوضة عن الوظيفة مس اى مشاريع ( تربية النعام و الجاموس والماشية )
اى منهم هيخلية يربى
كلامى دة صدقونى هيساعد كتير من الناس فى انشاء وعمل مزارع وسوف يضعنا على قائمة المصدرين للطيور النادرة
خد يقولى اية الفرق بين مزرعة الطيور النادرة ومزرعة النعام او الماشية هل اصحاب مزارع النعام والماشية دول بيربوا للهواية فقط وهل فيهم من كان لة فى تربية هذة الأشياء
كلامى دة هو كان سبب فى انتشار تربية النعام فى مصر وكثرة المزارع
وشكرا

[legend55555]

يا استاذ احمد كام واحد من رواد السوق وتجاره الكبار وكام واحد في مصر يعرف المنتدي
العدد كبير اه بس مش زي اللي ميعرفوش
انا اقدر اقول لحضرتك ان نسبة 80%من اللي بيربوا طيور زينه ميعرفوش المنتدي ومبيهتموش بالعصافير لدرجة انهم يبحثوا عنها عالنت
اي كان عدد العصافير اللي عندهم
وبصراحه ياريت العصافير تغلي معظم الهواه الحاليين هيحققوا مكسب كبير انا العصافير اللي شاريها بالف هبيع زغاليلها بالفين ومش هفرط فيهم عمري عشان ده مشروع ساعتها راس ماله جنيه وبيجيب ضعف راس المال في 3 شهور كحد اكثر تمام بس اللي هيتظلم اللي معندوش عصافير وعايز يبدا يربي
وعلي فكره لو رجعنا للسوق من 8 سنين كانت نفس الاسعار بتاعة دلوقتي عشان مكنش حد بيشتري غير الهواه
بس اللي خلي الاسعار تغلي لما بداء تجار الدول العربيه يشتروا العصافير بكميات كبيره وكانوا بيرفعوا الاسعار عشان يجمعوا اكبر قدر من الطيور عشان عارفين هم ازاي هيردوا تمنها عشر مرات لما تتباع في بلدهم
من 7 سنين كحد اكثر كنت ببيع الكوكتيل الزغاليل ب 40 جنيه الجوز وكنت بشتري الكبار الشغالين ب 50 جنيه الجوز يعني هي بالظبط نفس اسعار دلوقتي
مكنتش بتغلي غير بكتيره 10 جنيه بسبب موسم التزاوج عشان اللي كانوا بيشتروا هواه عايزين يفرخوا العصافير بتاعتهم
وعالعموم احنا في انتظار باقية ردود اعضاء المنتدي