اشعار احمد فؤاد نجم

[مالك الحزين]

احمد فؤاد نجم (الفاجومى)
هو شاعر مصر العظيم
نظم اروع الاشعار العاميه
لو قرأت اخى الفاضل اشعاره لوجدتها تنطبق على حالنا امس و اليوم و غدا
فهى اشعار لزمن العجز العربى
رجاء القراءه عده مرات حتى يفهم المعنى الخفى فدائما المعنى فى بطن الشاعر

( 1 )

يا عرب .. يا عرب .. يا عرب في أي مصر
يا عرب .. يا عرب .. اسمعوا صوت شعب مصر
أحفظوا لمصر المكان .. و احنا عالعهد اللي كان
مصر أوفى من الزمان ..
و انتو عارفين شعب مصر
يا عرب يا عرب يا أهل مصر

----------------------------
اللي خانوا العهد بينا .. و استباحوا كل حاجة
و استهانوا بالعروبة .. و استكانوا للخواجة
مستحيل حيكونوا منا .. نحنا حاجة و هما حاجة
هما باعوا الجلابية .. و الوطن و البندقية
و ا حنا أصحاب القضية ..
احنا ما بنبيعش مصر
يا عرب يا عرب يا أهل مصر
----------------------------
يطلع الدجال بزيفو .. يملا وادي النيل ضباب
ينزل الجلاد بسيفو ... يزرع الموت و الخراب
يطول الليل زي كيفو .... الصباح له ألف باب
و احنا بوصلتنا بإيدينا .. ما تخافوش من الليل علينا
مهما غبتو عن عينينا ..
انتو جوا بقلب مصر
يا عرب يا عرب يا أهل مصر
-------------------------
سينا و لا .. يافا و لا .. حيفا ولا ... دير ياسين
اسألوا الشمس اللي هالة .. عللي صحيوا مبدرين
يزرعوها نور و غلة .. دول جدودنا و لا مين ؟
حقنا و حتما ً يُعاد .. بس لو بانت سعاد
و البيان ده لوه معاد ...
و المعاد حيكون في مصر
يا عرب يا عرب يا أهل مصر


( 2 )


يا فلسطينية و البندقاني رماكو ..
بالصهيونية تقتل حمامكو فِ حماكو
يا فلسطينية و أنا بدي أسافر حداكو
ناري بإيديا و إيديا تنزل معاكو
على راس الحية و تموت شريعة هولاكو
............
يا فلسطينية و الغربة طالت كفايا
و الصحرا أنّت من اللاجئين و الضحايا
و الارض حنّت للفلاحين و السِقايا
و الثورة غاية و النصر أول خطاكو
........
يا فلسطينية و الثورة هيَّ الاكيدة
بالبندقية نفرض حياتنا الجديدة
و السكة مهما طالت و بانت بعيدة
مد الخطاوي هو اللي يسعف معاكو
.........
يا فلسطينية فيتنام عليكو البشارة
بالنصر طالعة من تحت مية ألف غارة
و الشمعة والعة و الامر كان بالخسارة
راجعين حيارى عقبال ما يحصل حداكو



( 3 )


ناح النواح و النواحة
على بقرة حاحا النطاحة
و البقرة حلوب .. تحلب قنطار
لكن مسلوب .. من أهل الدار
و الدار بصحاب .. و حدعشر باب (11 باب )
غير السراديب .. و بحور الديب
و غيلان الدار .. واقفين بنهار
و ف يوم معلوم ... عملوها الروم
زقوا الترباس ... هِربوا الحراس
دخلوا الخواجات .. شفطوا اللبنات
و البقرة تنادي .. و تقول يا ولادي
و ولاد الشوم ... رايحين ف النوم
البقرة انقهرت .. م القهر انصهرت
وقعت بالبير .. سألوا النواطير :
طب وقعت ليه ..؟
وقعت م الخوف
و الخوف يجي ليه .. ؟
من عدم الشوف

و قعت م الجوع و م الراحة
البقرة السمرا النطاحة
ناحت مواويل النواحة
على حاحة و على بقرة حاحا


( 4 )

فاليري جيسكار ديستان
والست بتاعه كمان
حيجيب الديب من ديله
ويشبع كل جعان
ياسلاملم يا جدعان
ع الناس الجنتلمان
د احنا حنتمنجه واصل
وحتبقى العيشه جنان
التلفزيون حيلون
والجمعيات تتكون
والعربيات حتمون
بدل البنزين برفان
وحتحصل نهضه عظيمه
وحتبقى علينا القيمه
فى المرسح أو فى السيما
أو فى جنينة الحيوان
وحتبقى الأشيا زلابيه
ولاحوجه لسوريا وليبيا
وحنعمل وحده أرابيا
مع لندن والفاتيكان
والفقرا حيكلوا بطاطا
وحيمشوا بكل ألاطه
وبدال ما يسموا شلاطه
حيسموا عيالهم جان
ودا بفضل صديكي ( صديقي)
ديستان الرومنتيكى
ولاحدش فيكو شريكى
فى المسكن والسكان

( 5 )


شرفت يانكسون بابا يا بتاع الوترغيت
عملولك ايمة وسيمة سلاطين الفول و الزيت
فرشولك اوسع سكة من راس التين على مكة
وهناك تنفد على عكا ويقولوا عليك حجيت
____________________________________
عزموك فقالوا تعالا تاكل بابمبون وهريسة
امت لانك مهيف سدءت انحنا فريسة
هات وشك خودلك تفة طبعا شلا يا صحاب البيت
___________________________________
خد منى كلام يبئالك ولونك موش حتعيش
لاحؤول أهلا ولا جهلا ولاتجى ولا ماتجيش
بيقولوا اللحم المصرى مطرح مابيسرى بيهرى
ودا كولوا من تاثير الكوشرى والفول أبو سوس بزيت


خالص تحياتى لكم
و لشاعرنا العظيم
المناضل ابن النيل الخالد
احمد فؤاد نجم

[عبده أبو سير]

شكرا لك جزيلا.
انا من اشد المعجبين به وبالشيخ امام بغض النظر عن مبادئهم.
فلقد عرفته من اغاني الشيخ امام.
واشتريت ديوان له.
وتقريبا حفظت جميع اغانيه.
ولقد اعجبتني جدا اغنية " لا تبكي يا ولدي"
تبدأ:
يا ولدي لا تبكي فأحزان الصغر تمضي كالحلم مع الفجر
وقريبا تكبر يا ولدي وتريد الدمع فلا يجري

وتنتهي:

لن يسقي دمع أشجارك لن تبني بالآه جدارك
فأصرخ في الخوف اذا زارك لا تخشى النار من الجمر.

والكثير الكثير قصائد جميلة.

[هيثم]

اخى العزيز مالك الحزين
احسنت الأختيار تسلم ايدك
فعلا انا من اشد المعجبيه
أشكرك