كوكو ومراته اللى طارت ...والنتايه الصفره والدكر الاسود

[brashy101]

السلام عليكم
انا مش عارف ابدا منين .وليكن التالي.الكروانه بتاعتي (مرات كوكو اللي انا مربيه من صغره) طارت وانا لله وانا اليه راجعون.الكلام ده من كام يوم وسابت وراها 3 صغار.بس كوكو طلع راجل وما شاء الله عليه بالرغم من انها اول خلفه ليه الا انه اكلهم كويس وبيراعيهم والحمد لله .ما شاء الله عليهم دلوقتى بقوا حلوين .لكن للا سف الحلو ميكملش .كوكو طلع ندل فى نفس الوقت .ازاي؟؟؟؟؟؟؟؟
المعلم دلوقتى بقي بيعض . ومش اي عض .بيعض بجد.لدرجه ان انا دلوقتى مسميه بالكلب.لان انا كل محط ايدي في القفص يجري وراها ويحاول يكلها.سبحان الله .من كام يوم كان زى العسل ويطلع علي ايدي وتمام .ودلوقتى مبعرفش احطله الاكل لان بخاف يعضنى


النتايه التانيه اللي عندي بقى .قليطه.بمعني ايه .جبتلها دكر اسود ميه ميه .وصوته جميل .وابن ناس .على فكره هى صفره.المهم يقرب منها ويمدلها رقبته عشان تهرشله.بس هى تقوم راحه خابطاه علي دماغه .لكن احيانا بتسيبوه يهرش لها.

الجديد بقي انا بفكر اغيرها بنتايه ايزابيلا احطها لكوكو الاولاني . واجيب نتايه بيضه تانيه للدكر الاسود.
لان انا عاوز اجرب واشوف ناتج تزاوج الابيض مع الايزابيلا ....والاسود مع الابيض
ايه رايكوا يا اسيادنا ؟؟؟؟؟؟؟؟؟؟؟؟؟؟؟؟؟؟؟؟؟؟
يلا سلام مستني . ردودكم يا غاليين

[mahseh]

السلام عليكم ,

اخى الكريم brashy101 ,

قدر الله و ما شاء فعل , عوضك الله خيرا منها و عله خير .

اولا بالنسبة للعض , فالطائر الآن تحت ضغط كبير و هو يشعر بالخوف على صغارة و الحزن على زوجته ( شكله كان مطلع عينها عشان كدة سابته و هربت ) , و هذا السلوك متوقع و ان شاء الله مع الوقت تقل هذه العدوانية و يعود كما كان , بالنسبة للخوف من العض فيمكن ارتداء قفاز اثناء تغيير الطعام حتى لا تشعر بالعض . و اعتقد و الله اعلم ان يد حضرتك كانت داخل القفص وقتما طارت الانثى مما جعل الذكر يربط بين يد حضرتك و بين الهروب , و اذا لم يكن كذلك فهذا بسبب القلق كما وضحت سابقا .

بالنسبة للانثى ( القليطة ) فهذا طبيعى طالما تتركه يهرش لها و هذا دليل على التوالف المبدئى و هناك سببين لضرب الذكر : الاول ( بتديلة على دماغه علشان ميعملش فيها زى التانى و يخليها تهرب ) و السبب الثانى و هو السبب الوحيد هو انها غير مستعدة للتزاوج بعد و هذا قد يكون بسبب الهرمونات و الافضل ابقاء الاضاءة 14 ساعة يوميا حتى يحفزها ذلك على التفريخ , بالاضافة الى الاهتمام بالغذاء و على العموم نحن على مشارف فصل الصيف و من يوم 21 يونيو يتم رفع العش . بالتالى سيحظوا بفرصة التوالف التام و الاستعداد للموسم الجديد . فعليك بالصبر و يمكن ان تضع معها الانثى الاخرى البيضاء على ان توفر لها عش آخر مع بداية الموسم الجديد ( و تغيظها عشان تبطل تمد منقارها على جوزها ) .

بالنسبة للسيد كوكو فعليك اخى الكريم الانتظار حتى فطم الفروخ و اذا امكن ساعده على اطعامهم بالسرنجة , ثم بعد ذلك افصلهم بعد التأكد من انهم اعتمدوا على نفسهم تماما فى قفص منفرد و اشترى له ( طنط كوكى ) الايزابيلا .

و الله يوفقك

[brashy101]

تسلملي عيونك يا هشام باشا.
ربنا يبارك فيك...............................
طلب من جنابك .ايه الانواع اللي بتربيها فى الكوكتيل ؟ويا سلام بقي لو فى صور .
جزاك الله خيرا عنا

[mahseh]

السلام عليكم ,

اخى الكريم brashy101 ,

حاليا لدى طائر واحد مدرب , نوعه فون ( Fallow ) , و ربيت من قبل لوتينو و بيرل و نورمل ( لكن لم اصور النورمل ( العادى ) )

ستجد اخى الكريم صورهم فى هذا الرابط :

viewtopic.php?t=40598

و الله يوفقك