استعدادت الموسم الجديد (علي لسان طائر )

[legend55555]

النهارده هكلمكم عن استعدادات احد الهواه للموسم الجديد
(اتمني انه يكون ماشي معانا صح احسن اضيع انا والعصافير الغلابه اللي معايا )

اعرفكم بنفسي انا اسمي ابوقرون من نوعية البادجي الشوشه
ومعلش متستغربوش من اسمي انا صاحبي سماني كده لاني كانت شوشتي غير متناسقه لكني كنت اول طائر شوشه انتج طيور كورك لصاحبي وانا بدون كورك وتقريبا انا احَب الطيور لدي صاحبي





واول حاجه عملها زي ما اتعودنا اننا لقيناه بيجيب طيور جديده واحتفظ بالكثير من ابنائنا اللي احنا انتجناهم الموسم السابق وعرفنا بعد كده ان ادخال طيور جديده ده مهم جدا وبيتم قبلها بفتره عشان تعتاد الطيور الجديده علي طريقة معيشتنا ونظامنا الغذائي وعشان هو متعود يشتري طيور صغيره ويربيها بطريقته
ودول اتنين ابني وحفيدي اتمني من الله انهم يكونوا من الاباء الجيده في الانتاج باذن الله ويكملوا مشواري بنجاح بعد عمر طويل طبعاً










واول ما بداء شهر سته في الدخول وبدات الحراره ترتفع عندنا قرر انه يريحنا عشان يحمينا من مخاطر الانتاج صيفاً
وده بجد مهم جدا لينا عشان انتوا متعرفوش احنا بنتعب قد ايه لما بننتج في الصيف وايضا صغارنا بيتعبوا مننا جدا وكتير منهم بيكون ضعيف وهلكان فلازم تحافطوا علينا عشان نقدر نواصل معاكم بنفس القوة ده حتي انا بسمع كتير من صاحبي ان لاعيبة الكوره اللي هم من وجهة نظركم صحتهم ممتازه لازم ياخدوا فترة راحه بين كل موسم كروي والموسم اللي بعده عشان يستعيدوا قوتهم من تاني ولازم اجسامهم ترتاح فتره فما بالك بينا احنا الطيور



طبعا قرار اراحة الطيور مش هيقدر ينفذه بين يوم وليله
عشان كده هو بيحاول يبداء من اول شهر سته انه يشيل الاناث اللي زغاليلها اكبرها بقي عمره 3 اسابيع عشان يسيب الذكر يكمل تاكيل وبكده يتفادي ان الانثي تجهز لوضع البيض من جديد ثم فصلي انا وباقي الذكور في اقفاص اخري عن طريق وضع كل ثلاث او اربع ذكور مننا في قفص بعد رفع البياضه منه ليتم تطهيرها
وانا سمعت انه بيستخدم اكثر من ماده لتطيرها عشان يجهزهلنا للموسم الجديد فاول شئ بينضفها من النشاره اللي باقيه فيها من الموسم السابق ثم يقوم بغسلها بالماء اولا للتنظيف المظهري ثم يبداء في نقعها في الماء 5 دقائق لكل بياضه وبيكون مضاف للماء اكتومثرين وده بشري للقضاء عالفاش ان وجد وايضا يقوم بنقعها مره اخري في ماء بكلور لتطهيرها وبيحطها في الشمس عشان تنشف وفي بداية الموسم بيقوم بوضعها مره اخري في الماء ولكن هذه المره يضيف للماء بي توكس وبكده بيكون البياضه مرت علي اكثر من مرحلة نضافه وتطهير وبتكون جاهزه للموسم الجديد باذن الله





المهم نرجع لانه فصل كل 3 او اربع ذكور في قفص ووقتها احنا استغربنا ليه مفصلناش كل اتنين في قفص عشان عالاقل يعطينا مساحه اكبر لكن هو كان عنده حق لانه خاف ان في حالة وضع ذكرين فقط ربما يحدث خلاف لرغبة احدهم في فرض سيطرته لكن الحال بيختلف لو هناك اكثر من ذكرين في نفس القفص وده كان رايه واحنا اعجبنا بيه عشان طبعا هنفضل 3 شهور في نفس القفص فالاحسن ان يكون معانا اصحاب كتير اهو نسلي بعض في فترة الراحه ومخبيش عليكم انا كنت بحسد زوجتي لانها موجوده مع كل الاناث في مكان كبير عنا لكن نعمل ايه بقي لصاحبنا اللي معندوش غير سلاكه واحده كبيره وبرده الافضل انه وضع فيها الاناث عالاقل عشان لا يصابوا بالسمنه لو المكان ضيق وعشان يستعيدوا حيويتهم من جديد

طبعا بعد كده بداء في وضع برنامج غذائي لينا احنا والاناث بيعتمد فيه عالحبوب بصفه دائمه وفيتامين سي ايضا لمقاومة درجة حرارة الجو وبجد مخبيش عليكم فيتامين سي ده فدنا جدا ورطب اجسامنا بالاضافه طبعا للدش اللي بيدهولنا بالبخاخه كل يوم او يومين في وقت الحر وياسلام لو بقي شوية جرجير بجد بنبقي في منتهي السعاده بيه وخاصة انه بيفدنا كذكور لانه بيرفع معدل الخصوبه عندنا وايضا قشر البطيخ مفيد جدا بس البينو وهو احد الذكور اصحابي مش بيحب قشر البطيخ اوي لانه لما بياكله بيخلي لون وشه احمر وبنفضل نتريق عليه مش قولتلكم بنتسلي في فترة الراحه برده

وده صورته وهو متشيك وغاسل وشه هههههههههه




المهم هو وضع برنامج غذائي جديد بداية من اول شهر ثمانيه حتي الانتهاء من فتره الراحه اللي بتنتهي في منتصف شهر 9

بيعتمد فيه عالتالي استخدام فيتامينات متنوعه يومين متتالين ورا بعض كل اسبوع ويومين بيض بالبقسماط ويومين قمح منقوع بكميات بسيطه

والاسبوع اللي بعده نفس الانواع مع تغيير نوع الفيتامين

ثم يقوم بعمل برنامج للاناث مختلف عننا في الاسبوع الثالث والرابع
وهو انه بيحاول زيادة معدل الكالسيوم لديهم بوضع كالسيوم سائل لهم في الماء يومين
وراحه يوم وكالسونات يومين وباقي الاسبوع ماء نظيف واحنا بيستمر معانا علي نفس البرنامج السابق


وده صوره لمجموعه من الادويه والفيتامينات







واخر اسبوع بيقوم في اوله بوضع الايفرمكتين لكل طيوره في الماء ليقضي بيه علي الديدان الداخليه في الجسم والفاش ايضا عدونا اللدود وعشان يبقي في وقت متاح انه يكرره بعد 14 يوم قبل ما نقوم بعملة التزاوج

ويقوم باراحتنا يوم ثم وضع الاملاح المعدنيه 4 ايام متتاليه
وبكده بنكون وصلنا لاول شهر تسعه

وهنا بيكون قام بتنظيف الغرفه بالكامل بالماء المضاف اليه البي توكس
وبيقوم بفصل الذكور اللي هيعتمد عليها في الموسم القادم كل ذكر في قفصه وبيهتم في الفتره ده بوضع فيتامين ه سيلنيوم ليزيد من معدل الخصوبه لدينا وبالنسبه للاناث بيهتم بوضع الاملاح المعدنيه لهم باستمرار عشان يزود الجسم بالمواد التي سيحتاجوها في تكوين البيض الموسم القادم ليزيد من عدد البيض لدي الاناث ولتجنب العديد من المشاكل
هذا طبعا بالاضافه للبيض المسلوق بالقسماط





ثم يقوم بوضع الاناث للذكور بداية من منتصف شهر تسعه وان كان هذا اول تزاوج للزوج لديه يقوم بوضعهم في اليوم العاشر من شهر 9 كمحاولة منه لاتاحة وقت 5 ايام اضافيه لهم بهدف محاولة الوصول للانتاج في نفس الوقت لجميع الطيور وايضا بيكون مجهز ازواج من النوع العادي اللي بتقوم بتحضين الصغار علي اكمل وجه عشان لو لاقدر الله زوج من الجداد معرفش يهتم بصغاره يقدر يلاقي زوج عادي يقوم باطعامهم بدل منه








وبكده بنكون وصلنا لمنتصف شهر تسعه وادعولي بقي ان ربنا يرزقني بصغار هذا الموسم مميزه حتي اسعد صاحبي واحاول ان اشعره بنتائج المجهود اللي بذله معانا طوال فتره الراحه











اتمني ان اكون وفقت في شرحي لكم خطة الموسم الجديد والله ولي التوفيق ، وصلى الله وسلم على نبينا محمد بن عبد الله وعلى آله وأصحابه وأتباعه بإحسان إلى يوم الدين

يمنع نقل الموضوع بتاتا بدون كتابة اسم صاحبه

[HOSSAM AHMED]

مشكور اخى العزيز و المربى المحترف على سرد هذا الموضوع الشيق و المفيد

وهذا ليس بجديد على مربى محترف مثلك

بارك الله فيك اخى واثابك خيرا

[أحمد شلبي]

ما شاء الله لا قوة الا بالله

الله ينور يامحمد باشا
فعلاً مربي محترف بارك الله فيك وفي طيورك
وجزاك الله كل خير على عرض هذا الموضوع الشيق الجميل

[Cobalt]

السلام عليكم و رحمة الله و بركاته

أخى الحبيب محمد عاطف
ايه الجمال دا ......... موضوع أكثر من رائع
و مجهــــــــــــــــــود جبار .... و خبرة لا تأتى الا من خبير كبير مثلك
بارك الله بك و بارك لك فى طيورك
و ان شاء الله نرى انتاج متمير فى الموسم القادم
جزاك الله خيرا أخى الحبيب و فى انتظار ابداعاتك .. فأنا أعرف أن لديك
و الله المستعان

[legend55555]

بجد شرف كبير ليا وجود ردود ثلاثه من اعز الاخوه اللي بحترمهم وبقدرهم في منتدانا كاول ثلاث ردود علي موضوعي
ومشكورين جزيلا علي تشجيعكم لاي عضو باستمرار
وللاسف انا كسول جدا في كتابة الموضوعات مش عارف ليه بصراحه
بس احيانا كثيره افكر في موضوع واتردد في نشره حتي هذا الموضوع كتبته من حوالي 3 ايام
وكنت كل يوم اتردد في نشره ولكن حمدا لله انه اعجبكم
ومشكورين مره اخري عالمرور

[أحمد شلبي]

أخي الحبيب محمد عاطف جزاك الله خيراً
وأنت ما شاء الله عليك استاذ كبير وعلى خبرة ما شاء الله وعلم
فلا تبخل علينا بهذه الموضوعات المميزة
وبعدين ياباشا اكتب انت ولو مكسل تنشرها ابقى ابعتلي وانا انشرها

[حموود]

موضوع رآئع من شخص أروع تقبل تحياتي...

[alaa aldin]

بسم الله الرحمن الرحيم
شكرا يا ابو حميد على الحوار والصور الجميلة عوضت غيابك امس لقد افتقدناك كثيرا
اخوك علاء الدين

[walidlo76]

موضوع جميل يا محمد ما شاء الله ووحشتنا يا عم ووحشنا نتعلم منك
سلامى ليك
اخوك وليد شكرى

[سلومي سلوم]

مشكور أخي على الموضوع الشيق والجميل

اللهم صلي وسلم وزد وبارك على محمد وآل محمد
اللهم صلي وسلم وزد وبارك على محمد وآل محمد
اللهم صلي وسلم وزد وبارك على محمد وآل محمد

تحياتي , سلومي سلوم