مشكلتي مع متوتي

[تيتة]

السلام عليكم ورحمة الله وبركاته
بخبركم عن متوتي "طائر الدرة"
عندي متو انثى والحمدلله دربتها على الكلام وتقول "متو -مياو"
وتطلع اصوات غريبة
المشكله انها ما تتكلم معاي .احاول اسولف معاها عشان ترد علي ما ترضى
ولما تكون بروحها في الغرفة تتكلم او اكون معاها بس ما اطلع صوت "يعني اشتغل على السايلنت"
ولما اخواني يكلمونها عادي .وحاولت اقلدهم ما قدرت لانهم يسون حركات بيدهم ويصارخون عليها عشان ترد عليهم .
قولولي شو اسوي معاها عشان تسولف معاي
والمشكلة الثانية
هي ما تحب حد يلمس ريشها
ارجوكم عطوني حل
والسمووحة

[كوتوليك]

اذا انت كنت توك شري الطير
فاحسن حل انك تعطيه وقت على شان يتاقلم
معاك.
مع تحياتي...

[أبو مدين]

أختي تيتة ؛؛؛؛

تربية الطيور تحتاج إلى الصبر وإلى بعض الجهد

لاكن من عندي نصيحة إذا كان يستقبل كلام لا تعلمية الصفير ليش

علشان بعد فترة بتحسي بملل قليل منة لأنة حيكون مثل الروتين

لاكن إذا عندة كلام بيصير مثل التجديد عندك .

عندي واحد من قبل ثلاث سنوات اشتريتة ولم يتفاعل معي إلى

من قبل ممكن سبعة شهور ( هذه ليست قاعدة ولاكن على نفس

الطير والمربي ) لا لا لا تخافي أنا كنت مشغول وأهملتة

ولو كنت متفرغ لة لكان الي أريد أقولة كثفي التدريب و

الإهتمام راح اتشوفي ؛ إن شاء الله ؛ إنة يتجاوب

[تيتة]

مشكورين على ردودكم
الصراحة ان متوتي كملت تقريبا عندي اربعة شهور فقط
هل تعتقدون انها راح تسولف معاي بعد ست او سبع شهور؟
وانا افكر اشتريلها زوج
بس اخاف اشتري الحين لانتشار انفلونزا الطيور
لاني اعتقد ان الذكور يحبون يسولفون مع النساء من بني البشر
والاناث تحب تسولف مع الرجاجيل
لاني الاحظ متوتي تسولف مع الاولاد والسموووحة

[muhannad2]

اهلين اختي العزيزه تيتة

ماعتقد انها ماتحبج ولكن مش مـتأقلمه معاج وعلى ماعتقد ماتعرف من صاحبها لازم تحسسينها انج مهتمه فيها وايد ولما تسمعينها تردد كلام عطيها هديه مثل تفاح او اي شي من الفواكهه تاكله

انا عندي متو ربيتها وهي صغيره عمرها 1 اسبوع والحين صارت كبيره وعمرها 7 شهور تقريبا وتحبني وايد ولكن ماحصل وقت اهتم فيها وماشوفها الا الاربعاء والخميس والجمعه بس احاول اعوضها عن الايام مثل علمتها( تقبل شفاتي ) لما اشوفها على طول تقبلني وتحبني وعادي تحبني لما امسك جسمها ليش لانها تعتبرني ابوها لاني مربنها وهي صغيره وانا مسمنها متو هي مرات تقول ( متو ) وتقلد صوت التليفون

بس هذي الايام ماقامت تتكلم لانها تفتقدني كثير ولما تشوفني تسوي حشره وتتكلم بس

معلومه الانثى صاحبة مزاج تحب تتكلم بأي وقت هي تكون مرتاحه فيه يعني على كيفها

بس انصحج ترددين الكلمه جدامها وتعلمينها تصعد على كتفج وتلعب معاج وعطيها العاب من عندج علشان تعرف انج قاعده تلعبين معاها وتسلينها

ومانصحج تشترين لها ذكر لان اذا اشتريتي ذكر راح تنساج وماراح تسوي لج سالفه وبتتفرع حق زوجها

واذا كانت متوتج مدربه من شخص ثاني فا هي مش متعوده على حد غيره ويبغالها وقت علشان تتعود عليج

اصبري لان تربية الدره يبغالها صبر

[تيتة]

مشكور يا اخي على ردك
انا علمتها تبوسني والحمدلله تبوس كل من يشيلها
و في هذي الايام في رمضان تفطر معانا وتموت في شيء
اسمه سمبوووسة
ويوم تشوف كاس الماي ما تصدق تسير تتسبح فيه
وتيلس تضاربنا عل اليح "البطيخ الاحمر" تحاول تسحبة من ايدي
بس المشكلة الوحيدة ما ترد علي بالكلام
بس في الحركات واللعب انا وياها
والسموووحة