السلام عليكم ورحمة الله وبركاته
الصراحه هذي اول مشاركه لي واتمنى اكون ضيف خفيف عليكم وما ازعج احد منكم وان شا الله ما تشوفون مني الا كل خير
بداية احب اشكر
جميع المسؤولين عن المنتدى وخصوصا المؤسس له(نسيت اسمه صراحه)لما يقدمه من معلومات ونصائح وكل شي صراحه يطري على البال...انا ما عرفت المنتدى الا قبل يومين وصراحه من قرايتي للمواضيع ما قدرت استحمل قلت لازم انشب لهم واشارك معهم 
على كل حال السبب الرئيسي اللي خلاني اشارك واكتب الموضوع هذا هو طيري وما ودي اطول عليكم..اليكم السالفه من الى
يا طوال العمر يوم من الايام مسكت معي على ببغاء
..طبعا ما كنت افقه اي شي في الببغانات ابد...رحت لمحلات متخصصه في الببغانات وما شا الله ناس ثقه ومحترمين المهم يمين ويسار واسئله لصاحب المحل عشان اعرف وش افضل الانواع والاشكال..في النهايه قررت اني اخذ فرخ افريقي رمادي وهو طبعا مهو مصيود ومستورد...لا تربية مزرعه وتفقيس يعني الييييف ما شا لله مررره...واخذته ب 3100 ريال سعودي..طبعا الكلام هذا قبل ثلاث شهور بالضبطالمهم اول ما اخذته حطيته في البيت فتره على بال ما اعتاد على الجو وارتاح نفسيا
بديت احاول معه واكرر الكلام واعلمه عليه واستمريت معاه فترة الين في الاخير صار الطير يحبني حب مهوب طبيعي والحمد لله يعني من اول ما يشوفني شوي وينهبل يبغاني اطلعه على يدي واحك راسه والعبه...والصراحه صرت انا نفس الشي ما اقدر اجلس فترات طويله من دون ما اشوفه يعني سبحان الله كأنه واحد من افراد العايله
المهم كان اول ما جبته ما يصفر ولا شي
بعدها بفتره صار يصفر على خفيف بعدين صار يصفر بنغمات ويتفنن فيها وصار يطلع تصفيره بنغمه انا اصفرها له دايما...يعني الحين محترف تصفير الولد
..المهم تطور شوي وصار يطلع صوت كأنه كلام يعني صوت كأنه غرغره لكنه مهوب مفهوم وصوت خربطه وطقطقه والى الحين وهو على الحال هذا...المهم انا مليت من التصفير لحاله وابغى اشوف كلام لكن ماشفت شي وبديت امل وأيأس منه..لكن بعد فتره وديته لصاحب المحل وهو ما شا الله عنده خبره طويله...يوم وريته الطير اعجب فيه وفي اهتمامي فيه..قال ما شا الله الطير صحته زينه ونفسيته زينه وكل شي تمام...وقال لي ترا الطير الان حافظ كلام كثيييير ...قلت له كيف عرفت قال من بؤبؤ عينه لأنه يكبر ويصغر بسرعه
...انا استغربت لكن قلت الرجال خبره واكيد كلامه صحيحالمهم قالي ان الحل الحين اللي تسويه معاه عشان يتكلم انك تحطه في مكان رفيع شوي وما تعطيه وجه ابد
وما تكلمه ولا كأنه موجود في الغرفه وتحطه عند تلفزيون او مكان يصير فيه ناس يتكلمون كثير...قلت له طيب ليش ما اكلمه وما اعطيه وجه...قالي عشان يصير الطير يبغاك تجيه وتلعبه وانت ما تعطيه وجه يقوم هو يحاول يلفت نظرك بأي شي بالتصفير والحركات اللي عنده وفي الاخير بيطلع الكلام اللي هو حافظه وخليته على الوضع هذا والى الان وانا متبع الاسلوب هذا معه وصار له ثلاث اسابيع:(...والصراحه كاسر خااااااطري:(:( مره وودي اطلعه والعب معه لأن شكله حاس بالملل وشوي وينهبل اذا دخلت الغرفه وما كلمته وما لعبت معه...خصوصا اني كنت حاطه على ستاند والحين مرجعه للقفص لكن انا متبع كلام صاحب المحل محاولة في انه يجيب نتيجه معاي بس مع هذا كله ما فيه اي نتيجه وما طاع يتكلم ابد مع اني حاولت كل شي معاه لكن ما فيه فايده
والكلام اللي علمته اياه هو
-كوكو وهو اسم الطير(مسمي نفسي على اسمه
)-حبيبي
-يا حلو
-سلام عليكم
-مع السلامه
احك راسك
-انقلع
-هات بوووووسه واطلع له صوت بوسه
-خالد<<اسمي
اتمنى اللي يقدر يساعدني ما يبخل علي بالمعلومات لأنه بصراحه صارت اكبر امنيه عندي ان كوكو يتكلم
ااااسف جدا على الاطاله لكن حبيت ابين لكم الصوره بشكل كامل وواضح واللي يقرا شي ولا يفهمه يعلمني واللي يبغى يستفسر عن شي زياده عن الطير برضه يقول لي وانا حاظر لكن تكفوووون ابغى كوكو يتكلم
