الحمد لله قدرت أصور عصافيري علشان تشوفوها و تقولوا رأيكم فيها ، سامحوني الصور مش واضحة شوية ، بس زي ما بيقولوا "ما لا يُدرك كله .. لا يُترك كله"
ده الذكر العجيب ، و هو بصراحة تمااااام
علشان كده عايز أسميه اسم يليق بيه 
... عنتر ؟... لأ مش كفاية ، أنا هسميه بلاي بوي .. يادوبك نوفيه حقه
لاحظوا إنه منقط بعين سوداء بدون حدقة و وجه أصفر (أظن نوعه منتقط متنحي) و أنا بصراحة عاجبني لونه جدا لأنه يجمع السماوي بالأصفر و كمان باندد ( منقط ) ، وهو مش أبيض و لكنه كريمي فاتح و نفسي أشوف انتاجه مع أنثاه الزرقاء.
و دي صورته و هو يطعم أنثاه
و هي بصراحة أنثى عنيدة جدا ، و أنا كنت حاولت أولفها مع الذكر الأصفر (اللي في الأسفل) و طبعا "ورته النجوم في عز الظهر" و كان هيروح فيها يا عيني ، أما الدكر ده فعلمها الأدب
، مرة بالمغازلة و الحب و مرة بالمناوشة و الضرب ، و خلاّها - زي ما انتو شايفين - تمشي على العجين ما تلخبطوش ، و هي دلوقتي راقدة على أربع بيضات و حامل في واحدة تانية . هو الصنف ده كده .. ما يجيش إلاّ بالعين الحمرالاكن يا خسارة .. الحلو ما يكملش ، اليوم فحصت البيض ، و كانت النتيجة .. O .. ولا بيضة مخصبة
طبعا كانت صدمة قوية ، طيب إيه السبب ؟.. يمكن فيه زغب كتير حول فتحة الجماع ، أو يمكن الدكر مش كبير كفاية مع إنه طول النهار يغازل في الأنثى و مش سايبها في حالها ، طبعا أنا كنت شاريه على إنه كبير و شغال ، بس انتو عارفين طبعا كلام تجار الطيور ، كلهم " ثِقات و عُدول " و كلمتهم ما تنزلش الأرض أأأبدااا...
يا ريت تعرفولي عمره قد إيه و تنصحوني أعمل إيه مع الجوز ده
و ده الدكر الأصفر التاني ، منقط بردو و لكن حجمه أصغر ولكنه نشيط و كويس بس أظنه لسة صغير رغم إني جايبه بردو على إنه كبير
و دي الأنثى المريضة
و أنا كتبت موضوع عن حالتها في منتدى أمراض البادجي و نفسي حد من خبراء البادجي يجاوبني فيه ، طبعا أستاذنا عبده أبو سير لم يتأخر عني بس ردوده يا دوبك سطرين ، كتَّر خيره طبعا لأنه بيرد على كل المواضيع تقريبا ، و أنا بصراحة مستغرب بيجيب وقت منين ، أكيد اليوم عنده 30 ساعة ، أو الساعة 100 دقيقة. المهم الموضوع على الرابط ده بس قبل ما تفتحوا الرابط عرفوني إيه رأيكم في عصافيري الأول.
دي كل الطيور اللي عندي حاليا ، هتقولولي عامل كل الدوشة دي على 4 عصافير بس ؟..
أنا كان عندي قبل كده عدة أزواج من البادجي ، إلى جانب بعض الكوكاتيل و الزيبرا و جوز فيشر ، طبعا كل نوع و ليه مذاقه الخاص في تربيته ، و لكن حصلت ظروف عطلتني لفترة كبيرة ، ثم رجعت للهواية الجميلة دي بالصدفة عن طريق جوز بادجي هدية ، و بالوقت عرفت إنهم أنثتين و اشتريت لهم الذكرين إللى شفتوهم
أنا خلصت كده .. قولوا لي إيه رأيكم ، و ما تنسوش عصفورتي المريضة
أخوكم هيثم
