انظمة الحمام الزاجل

[joe10]

السلام عليكم ورحمة الله تعالى وبركاته,,,
الموضوع قام بطرحة الاخ صالح احد الهواة والمربين للحمام الزاجل من مدينة مصراتة
وكان نص الموضوع...

جانسن في عهده كان يكره طريقة الارامل وكان يتسابق بالازواج او فراخ وفي عهد ابنائه استخدمو طريقة الارامل سؤالي الي الكل ايهما انسب؟ وافضل؟
وياريت الاعضاء245 عضو يشاركونا لان نلاحظ في خوي جلول بارك الله فيه دايما يشارك وشكرا

نقلت الموضوع لمنتدى الجمعية لاني اراه مناسب ولكي يستفيد الجميع ان شاء الله

[joe10]

في البداية اشكر الاخ صالح على طرحه للموضوع وكذلك سؤال الاخ عبد المجيد من مدينة طرابلس بالتحديد فشلوم, سأقوم بالإجابة بشكل ملخص ان شاء الله مع بعض الإضافات الخاصة التي تعلمتها خلال فترة تربيتي وتجربي لهذه الإنظمة وللتسهيل سأستعمل مصطلحات بلغتنا الدارجة...



بالنسبة لنظام الارامل خوي صال ويا اخ عبد المجيد هوة عبارة عن تكوين ازواج وبعدين تخليهم لين يدحو لمدة 10 ايام او اكثر المهم قبل ما يفقس الدحي ومش الايام الاولى من لما تدحي الانثى لانها حتكون متعبة, بعد ال10 ايام يتلوح الدحي وهذي الحاجة المش كويسة لانك ترمي البيض وتاني شي التزاوج بين الطيور يقلل من قدرته اتبع هذا الاسلوب لكن منخليش الزوج لين يدحي بل بطريقة اخرى يطول شرحها, المهم خلي نكملك, بعد ما ترمي البيض يبدا التدريب تعزل الزوج عن بعض, وتاخد الذكر وترخيه سواء للتدريب او للسباق, لما يولي الذكر للوفت تخليه يشوف الانثى لمدة دقايق وتعزله من جديد وهكذا, لكن في هذ الحالة لازم يكون لوفت الإناث معزول تماما عن لوفت الذكور لان الذكور تتأثر بصوت الاناث والعكس, وشي آخر كل عدة سباق لازم المربي يعيد تأهيل الذكور لان بين تزاوج وسباق يتعب الطير, ولازم من جدول تحدد السباقات لي يشارك فيها الطير. وهذا لي نسموه حتى الوايدوهوود widowhood هوة نفسه نظام الأرامل.

اما في الشكل الثاني نظام التوتال وايدوهوود كل لي ذكرته في التعليق السابق لكن يخلي الدحي لي يفقس ويربي الفراخ بالنسبة للتفريخة الاولى ما تضايقاش باش يزيد يتعلق باللوفت والمرة المقبلة تبدا في الاسلوب هذا بشهرين على الاقل والميزة لي كويسة انك تقدر توكل الفراخ بروحك وبعدين ما تخسرش التفريخة. في الحالة هذي عمر الفراخ يكون من يوم إلى 15 يوم. نسموه حتى النظام الطبيعي.



لكن فيه شوية صعوبة في الحالتين لي همة ان الحمام لما ترخيه للتدريب يفكر يولي للعش متاعه ومرات ما يطيرش بعيد عن اللوفت او ما يطلعش من اللوفت اصلا, فيه في الحالة هذي يحط في علم يرفرف يزعج الحمام باش ما ينزلش بسرعة واني منحبهاش الطريقة هذي انك تجبر الحمام يدير حاجة اكثر من غريزته, لكن بالنسبة ليا وعن تجربة رخي الحمام ساعة في الصباح وساعة في المساء مليهش اي اهمية, اهم شي الرميات, لاني نترك الحمام براحته يطلع من اللوفت ويولي لكن مش معناها نخلي الحمام طليق طول اليوم لا نرخي الحمام واني نتكلم عن الحمام لي محضن سواء بيض او فروخ, يطلع يطير واول ما ينزلو كلهم نسكر اللوفت حتى بعد ربع ساعة عادي, المهم نكثف التدريب في الرميات, اول رمية 10 كلم, وبعدين ثلاث مرات 25كلم بعدين 100 كلم طول والنتائج الحمد لله, بالنسبة لي اوروبا عكس ما هوة في ليبيا من ناحية الجو وموسم السباق, بدأ التدريب نهاية شهر فبراير ونهاية مارس, مرات الجو يكون مناسب نبدأ حتى من ياناير لكن الجو حاليا صعب ثلج ومطر ورياح.

فيه اسلوب سهل للغاية لكن بالنسبة ليا نتائجه ما كانتش زي الوايدوهوود لي هوة اسمه نظام الباب المفتوح, او النظام الدائري في هذا الاسلوب اللوفت لازم يكون زي ما شرحتلك في التعليق لي قبل هذا, معنى النظام تخلي الإناث تخش او الفحول تخش لي لوفت الانات قبل موعد السباق لمدة ساعة او ساعتين حتى, بعدين تفصلهم وتحطهم في سلة متاع السباق, لكن طول الطريق لازم ما تخلطهمش مع بعض, لان الزوز يقعد في بالهم ان الذكر مزال في اللوفت يستنى وكذلك الفحل, فا تقعد في مخيلته ان الانثى مزال في اللوفت, بعدين النظام من وجهة نظري يساعدك خوي صالح لانك مش راح تخش في دوشة متاع التزاوج وتركيب الازواج وبيض وفروخ, وثاني شي تستفيد من الزوج في السباق, وربنا يوفقك ان شاء الله