شويه أسئلة محتاجه أجوبه من الخبراء

[د.رنا]

كنت محتاجه حد يكون عنه خبرة يساعدني في شويه استفسارات:

انا عندي طيور الحب طائر منهم تحول ريش وجهه للون الأحمر من حوالي شهرين اما الآخر فإلى الأن لم يتحول بصورة كامله وهو فعلا بدأ عمليه القلش متأخر عن الآخر لكن حاسه انه طول شويه.....ياترى كده فيه اختلاف في الأعمار ولا الطائر ده مش كويس؟؟؟

ثانيا انا شلت البياضه علشان اطهرها وكمان لما عرفت من المنتدى ان الطيور اللي عندي عمرها صغير..... لكن بفكر اركبها علشان يستخدموها حتى للنوم مساءا لتقيهم شر البرد .....ياترى كده صح وهل ممكن انهم يكون لهم انتاج في هذا الوقت من العام ؟؟؟؟

ثالثا بخصوص الفيتامينات ...هل يجب وضعها لهم من الآن ولا استنا شويه لما يكبروا؟؟


رابعا: الطيور التي املكها ذات سلوك غريب في الآكل ...مابيكلوش أي حاجه...مثلا مابيحبوش الفلارس خالص وممكن ياكلوا شويه في الدنيبه والبلكم إنما بيموتوا في اللب"دوار الشمس" وانا بطلت احطهلهم من ساعه لما عرفت انه ممكن يعمل تكيس ليهم ...لكن ممكن احطه لما أحب أأكلهم نوع من الخضار او مع وصفه البيض
انما بيقعدوا ينزلوا على الأرض ويحاولوا ياتقطوا ماسقط منهم من اللب زي مايكون ماعندهمش أكل... مش عارفه اتصرف معاهم ازاي أحطه ولا لأ؟؟؟

[medo2007]

الاخت الفاضلة دكتورة رنا
بالنسبة للطائر الموجود لديك ولم يحمر وجهه مثل زميلة ربما يكون اخر زغلول فى العش وبالتالى يكون اقل من جميع اخواتى دة شىء عادى جدا ولو انت شكة انه ضعيف ممكن تمسكى الفرد بيد وتمشى اليد الخرى تحت صدرة ولو وجدت عظم الصدر والبطن بارز يبقى فية ضعف او لو وجدت ان ريش الجسم نفسة ناقص ومنتف وغير متستف او مترتب دة برضة يبقى نقص فيتامينات
اما بالنسبة للوجبات التى تقدميها للطائر انا مازلت عند راى هذا الطائر طائر برى موجود بالطبيعة ياكل مايرد فى اى وقت ومن اى نوع حسب احتياجة لها
وبالتالى قدمى لهم جميع انواع الغذاء من الحبوب وياكل مايشاء اما بالنسبة للخضراوات نوعى لهم الخضراوات وبالذات الخس وابعدى عن الجرجير فى الصيف وقللى وجبة البيض بالبقسماط فى الصيف حتى تكون مرة كل 10 ايام
اما بالنسبة للفيتامينات فى راى الخاص متديش اى فيتامينات فى الصيف سوى أ د 3 هـ 3 ايام كل 10 ايام مع تغيير المياه يوميا مادمتى تنوعى لهم فى الطعام وهقولك هلى سر حربى
هاتى القمح العادى وليس البليلة واغسلية كويس جدا وانقعية فى الماء لمدة يوم كام فى المياة العادية وبعد ذلك افردية على حاجة واسعة ورشية اكثر من مرة لمدة 2 يوم بالمياة حتى ينبت ويخضر وقدمية لطيورك هذة الوجبة بمليون فيتامين
ونسيت اقولك ان ممكن يكون فقدان الشهية ناتج عن اضطراب معوى او ديدان بالبطن ياريت برضة تدى مطهر معوى نصف سم لمدة 3 ايام كل 15 يوم من الفلاجيل او الأنتينال البشرى
ارجوا ان اكون بكلامى هذا قد غطيت جميع اسالتك وان يكون فى كلامى استفادة لك وللأخوة الأعضاء
وشكرا

[ahmedabutaleb]

شكرا ياعم احمد ياموسوعة ربنا يزيدك علم

[Birds servant]

اختنا د.رنا أهلا بك أولا في هذا المنتدى الرائع ..وبالنسبة لأستفساراتك ..قدم اخونا medo2007 مشكورا معلومات سليمة تماما ومفيدة وستحقق معك إن شاء الله نتائج طيبة جدا..وأردت أن أضيف فقط بعض المعلومات:

بالنسبة لتحول لون وجه طائر الحب فهو شئ طبيعي ..فالبنسبة مثلا للطائر red faced فإنه يكون في سن الشباب (من شهرين إلى ثلاثة شهور) له وجه احمر باهت جدا ثم يتحول في سن اربعة أشهر إلى وجه به نقط حمراء داكنة ثم يتحول في سن ستة أشهر إلى لون احمر داكن جدا وكذلك الحال بالنسبة للأنثى..ويبدو ان هناك تفاوت بسيط في العمر بين الطائرين ولن يشكل إن شاء الله مشكلة وسيتحول قريبا لون وجه الطائر الآخر للأحمر الداكن..

يمكنك تركيب البياضة مرة أخرى وضعي بها نشارة خشب على إرتفاع 5 سم من قاع البياضة حيث ان طيور الحب تستخدم العش للمبيت أيضا وليس للتفريخ فقط..وعندما يصل هذا الزوج لسن البلوغ (من 6 إلى 10 شهور)..يمكنهما الإنتاج.. وتفريخ طيور الحب في الصيف ممكن بشرط توافر مياه لإستحمام الطائر ومواد لترطيب العش..

والفيتامينات يجب ان تقدم للطيور بإنتظام منذ السن الصغير..أما بالنسبة لحبوب دوار الشمس فإن تقديمها لا يسبب تكيس للطيور بشرط أن تقدم بكمية صغيرة يوميا مع وجود تنوع في أنواع الغذاء الأخرى التي تقدم مثل خليط الدنيبة والبينيكم والفلارس على أن تشكل نسبة الفلارس اقل نسبة ممكنة في الخليط..وباعدي بين فترات تقديم البيض المسلوق قدر الإمكان..واهتمي بتقديم الخضراوات الطازجة والمغسولة جيدا يوميا..وتاكدي من تثبيت قطعة من السيبيا بالقفص..

شكرا وبالتوفيق دائما إن شاء الله.

[د.رنا]

شكرا على الردود المفيدة جدا

وهجرب طريقه القمح دي يا مودو واقولك الأخبار

[medo2007]

نسيت اضيف شىء صغير ياريت تشيلى العش الموجود للطائر هذة الأيام للأسباب التية
1- الجو خار اليومين دول لا يستعدى انك تغطى العصافير
2 - انتشار الحشرات فى فصل الصيف وهمها الفاش الذى يمتص الدم من العصافير وعلى فكرة ممكن قوى يكون انسداد الشهية لدى الطيور بسبب الفاش الذى يتواجد بالذات فى الخسب فيياريت تنزعى البياضة دلوقتى
3 - صغر سن عصافيرك لاتستدعى وجود عش لانهم مش هيشتغلوا دلوقتى وممكن يطلعو نتايتين او ذكرين
ياريت تركبى العش قبل موسم التزاوج بشهرين بعد التاكد من انهم ذكر وانثى