نداء موجه الى الاخوة الليبيين

[(ابن الجبل)]

تحية طيبة للجميع

بما ان هذا القسم خاص بالمقترحات والافكار

اريد ان اقترح على الاخوة الليبيين انشاء جمعية طيور ليبية اسوة بالجمعية الفلسطينية

او الجمعية المصرية وغيرهم من الجمعيات الموقرة والرائدة

لماذا لا نفعل ؟؟؟

ولله الحمد لدينا خبراء ومربيين قدامى يشهد لهم الكثير

وهواية تربية الطيور معروفة منذ الازل فى ليبيا الحبيبة كغيرها من الدول العربية الشقيقة

ندائى موجه لكل مربى او هاوى او خبير ليبي

ارجوكم فلننهض بتجمع يحمل اسمنا يكون اشرافه مباشرة تحت هذا الموقع الرائع

انا لا اطالب بالانفصال لا سمح الله ولا بالتميز

ولكن هناك الكثيييير من الامور التى تحتاج لتجمع ليبيى خاص تناقش فيه امور خاصة

مثل اسعار الطيور واسواق لعروض البيع والشراء وسهولة الاتصال فيما بيننا

كما اطالب من الاخوة المشرفين ان يرعوا ويشرفوا على هذه الجمعية من فلسطين

ومصر والمغرب والجزائر وكل الاخوة العرب الاعزاء والين نفخر بهم ككبار فى عالم الطيور

من جديد يجب ان تشكل جمعية ليبية وفورا

وانا اول من يستعد للدعم والمشاركة والكد والجد لاجل انشائها واطلاق خدمتها

لتفيد كل الاخوة والاعضاء فنحن نعلم ان ارض ليبيا كسائر اراضى العرب بها اخوة عرب

غير ليبيين استفادتهم من السوق اللليبية ستكون اكبر واقوى من اى سوق اخر

لانهم يعيشون فى ليبيا

هل يعقل ان يشترى مغربى مقيم فى ليبيا طيوره من المغرب ؟؟؟؟

او ان يعيش ليبيى فى مصر ان يشترى طيوره من ليبيا ؟؟؟؟

ارجو من الاعضاء والمشرفيين الليبين بالتعاون مع الاخوة العرب اصحاب المنتدى

انشاء ورشة عمل فورية

لمناقشة كيفية انشاء وعمل وتسير مثل هذا المقترح والذى اقدمه بأسم

الكثييير من الليبيين الذين طالبوا بانشاء الجمعية الليبية

شكرا لكم واتعاونكم وللتجمع الدولى لعلم الطيور

فى انتظار ردودكم بكل شغف وامل وتفاؤل

دون ان اسميكم انتم تعلمون ان هذا النداء موجه لكم فأسعوا اليه

والسلام عليكم ورحمة الله وبركاته

[ألكسندر]

ياريت والله يا اخي بس كيف وماهي الاجراءات وما هي الدعومات وما هو السبيل لانشاء جمعية ليبية يا اخي

والله ياريت لو تسعانا في هالعمل يا اخي ياريت والله

والسلام عليكم

[(ابن الجبل)]

اخى الكسندر كل شى ممكن

انت ممكن تعرف ناس ليبيين فى المنتدى

تكلم معاهم قوللهم المقترح والحمد لله احنا الليبيين مميزين وعندنا ذوق عالى وحس رائع

لو تفاهمنا مع بعض ومع ادرة هذا الموقع الرائع حنقدر نوصل لهدفنا

يا ناس شن المشكلة زينا زى الاخوة العرب الاحباء

يعنى لازم ديمة ندور من برة واحنا من الداخل ماناقصنا الا التنظيم والتنسيق

خوى الكسندر ايدك معاى ممكن نديروا حل

وياريت خوى فريد من الزاوية والكرديلو الليبيى خونا محمود تى هذا بروحه علامة وماشاء الله

عليه نوارة فى المنتدى وصاحب خبرة ومحترف تبارك الله

خونا فريد ما يستهانش بخبراته

واكيد فيه غيرهم وغيرهم

وانت خوى الكسندر تبارك الله وانا معاكم فى كل شى

دعم دعاية اى شى والله بالجهد بالمال باش ما تبوها احنا جاهزين

المهم ليبيا يكون ليها جمعية زى غيرها

وبتنظيم من المنتدى نفسه وبالتنسيق مع مشرفى المنتدى

متفاهمين خوى الكسندر ؟؟؟؟

خليك معاى عالخط وربنا يستر بأذن الله

ولو قدرت تتكلم مع اى حد من ليبيا وتبلغه بالفكرة خليه يتواصل معانا هنا

وانا من جهتى حنكلم فريد والكرديلو الليبي وكل من نقدر

تى ليبيا معبية يا الكسندر معبية ناس وخبراء وروص كبيرة بجديات

غر ما عندهمش فى النت وديمة مشغولين بخدمتهم

شوف تلقاه يجرى ويخدم ووقته مش ليه

وتلقاه فى القرديل او الكنارى او البادجى او الزيبرا او الببغاوات خبييير كبيييييير

يعنى هواية بس مش موضوع رسمى دايره

انا نسكن فى الهضبة توالله مافيه حوش مافيشي طيور

ايدك معاى الكسندر وخليك معاى ونوصلوا بادن الله

سلام توة لانى طولت هلبة فى الرد الله غالب قلبى حارقنى نبوا نطلعوا زى الناس

[(ابن الجبل)]

الا من يرد ويتابع هذا الاقتراح اين انتم اخوتى من ليبيا

ماذا حدث وما القصة معقولة مش عاجبتكم فكرة التجمع الليبي ؟؟؟

خسارة والله كنت نحساب الكل بيرحب فيها ويسعى ليها

الله غالب يا ليبيا الله غالب

[الكرديلو الليبي]

السلام عليكم أخي ابن الجبل حاولنا من قبل جاهدين ساعيين لإنشاء جمعية لكن المشكلة ماعرفنش لمن نمشوا فياريت من يدلنا عند من نمشوا و نبدوا فيها

[(ابن الجبل)]

الاخ الفاضل محمود

يا رجل انتظرت ردك كثيرا

ياسيدى من تقصد لما قلت نمشوا قصدك حد معين يدعمنا ؟؟

الخبرات ولله الحمد موجودة والليبيين اللى محترفين فى الطيور اكثر مما تتصور

الباقالينو والقرديل والكنارى والزيبرا والحمام بجميع انواعه كل شى ربوه الليبيين

اهم شى الخبرات موجودة والحمد لله

وبعدين ياسيدى احنا ليش ما نبدوش بموقع على النت ونساهموا فيه كلنا ونطوعوا

بكل ما نقدروا عليه وخلى قبلها نتلاقوا ونحددوا مكان نجتمعوا فيه وبعدين اناقشوا كل ما نبوا

شن رايك ؟؟؟

[أبو بكر بن موسى]

السلام عليكم أخي الطيب ( ابن الجبل )

حياك الله أخي

وللعلم نحن معكم قلبا وقالبا

وموفقين ان شاء الله

والسلام عليكم ورحمة الله

[الكرديلو الليبي]

السلام عليكم
أخي (ابن الجبل) سامحني في التأخير على ردك
لكن أقصد في لمن نمشوا هو ما هي الجهة التي نذهب إليها لكي نكون جمعية معتمدة ليس عبثا هكذا و خلاص و الفكرة واردة من زمان و لكن كنا دائما نقف لهذه النقطة يا سيدي إنت ورينا الجمعية تتبع أي جهة بس و الباقي ساهل هذا قصدي من كلامي فقط ليس حد يدعمنا في شيء مادي أو خلاف ما ظننته بل بالعكس لدينا خبرات و الحمد لله
الله يوفقنا يارب