اخضر ورمادى ( من سلسلة القصص )

[ابو جميلة]

السلام عليكم ورحمة الله وبركاته
الحمد لله رب العالمين والصلاة والسلام على اشرف المرسليين سيدنا محمد وعلى آاله وصحبه وسلم
اخوانى الاحباب اسمحوللى ان اعرفكم بنفسى انا رمادى فرخ صغير لم يتجاوز عمرى الشهران ولكنى ومنذ اتمامى شهرى الاول وانا ملهوف على الخروج للدنيا ولصغر سنى فكان والداى يمنعانى من الخروج من العش لكى لا اصاب بأى مكروه او اسبب لنفسى المشاكل خارج العش وكان ابى يعاملنى بشدة فى بعض الاوقات واحببت ان انقل لكم هذا الحوار الذى دار بينى وبين ابى

رمادى : ابى هل ممكن ان اخرج من العش ؟
اخضر : لا مفيش خروج
رمادى : ليه
اخضر : قلت مفيش خروج
رمادى : انا جعان وعايز آكل ومش عارف ماما قاعدة فى العش ومش عايزة تخرج تجيب أكل
اخضر : انا هجيبلك أكل وآجى بس ما تتحركش ادخل عند مامتك
رمادى : حاضر بس كل لما بقرب لماما بتضربنى وعايزة تخرجنى بره
اخضر : خلاص ماتقربش وخليك جنب الباب
رمادى : يابابا حيرتنى افضل جنب الباب ولا اروح عند ماما طب ما تسيبنى اخرج
اخضر : يابنى اصبر عليا انا مش عارف الاكل ليه فيه حاجة غريبة
رمادى : ليه يا بابا ده انا سامع صاحبنا بيقول انه جايله اكل من بره وانا نفسى اخرج ادوق
اخضر : يابنى ماشى اكل من بره على عينى وراسى لكن انا مش متعود عليه
رمادى : طيب انا هعمل ايه دلوقت انا جعان
اخضر : حاضر اصبر هو هيحط البيض او القمح دلوقت وهأكلك حالاً
رمادى : طيب سيبنى اخرج انا اعرف آكل البيض والقمح انا عمرى شهر دلوقت
اخضر : يارمادى انا خايف عليك رجلك تتحشر هنا ولا هنا اسمع الكلام
رمادى : اى اى آخ بابا الحقنى ماما بتشد ريش جناحى ابو يااااااااااا
اخضر : اطلع اطلع يا رمادى بره اطلع
رمادى : حاضر حاضر انا ريشى وقع خالص
اخضر : معلش معلش يارمادى هى والدتك فيها الخصلة دى من زمان الحمد لله يا بنى انى انا عديت
رمادى : طيب هى ليه بتعمل كده يا بابا
اخضر : بتعمل كده لسببين الاول انها عايزة تاخد راحتها فى البيض زى ما اخدتها معاك فى الاول
رمادى : والثانى
اخضر : الثانى ان جسمها ناقصة بعض الاملاح والكالسيوم هى بتستطعمهم فى طعم الريش
رمادى : طب وبعدين انا هفضل كده ما هى لو خرجت هتشد ريشى تانى هعمل ايه
اخضر : معلش يا رمادى انا هحاول ابعدك عنها
رمادى : طيب انا هحاول آكل يا بابا علشان ما اتعبكش
اخضر : حاول انا بس مستغرب الاكل الجديد المفروض كان عودنا عليه واحدة واحدة مش يشيل القديم خالص ويحط جديد
رمادى : معلش يا بابا هو اكيد قصده مصلحتنا
اخضر : انا عارف انه عايز مصلحتنا لكن صعب نتعود على اكل جديد مرة واحدة كده لازم بالتدريج
رمادى : الحمد لله يا بابا انه بيعوضنا بالفيتامين الحق يا بابا الحق ماما جايه عليا الحقنى
اخضر : ما تخافش ماتخافش
رمادى : ما اخافش ايه يابابا الحقنى انت سيبتنى وجريت يا نهار ابيض طيب الحقنى ياا صاحبى انت الحقنىىىىىىى
اخضر : معلش يا بنى هعمل ايه بس ما انت شوفت جيت احميك لاقيت نفسى بعمل زييها حكم القوى يا بنى
رمادى : يا نهار ابيض يا اخونا الحقونى انا بقيت من غير جناحين الحقونى يا اخونننننننننناااااااااااااا

واخيراً قام صاحبى برفعى من القفص لكى ارتاح من هذا الهجوم الرهيب من ابوايا ولا اعلم لماذا يفعلون بى ذلك ولكن وضعنى صاحبى فى سلاكة كبيرة جداً يا خبر ابيض ايه يا صاحبى ده طيب حطنى مع حد قدى يا خبر ابيض ابعد يا عم انت وهو عنى الناس دى اكبر منى يا جدعان بتعملوا فيا كده ليه هو انا ريشى ده ايه جرجير يا اخواننا حرام عليكم يا صاحبى ايه اللى عملته فيا ده حد يشيل عيل صغير يحطه مع الشباب كده

وفعلاً انقذنى صاحبى ووضعنى فى سلاكة صغيرة بها اقران فى مثل سنى استطيع التعامل والاكل والشرب بشئ من الحرية والارتياح وتدارك الخطأ سريعاً واتمنى ان يدرك خطأ الاكل الجديد فيجب تغيير الاكل بالتدريج وليس بصورة مفاجئة هكذا وايضاً موضوع السن فيجب ان نراعى ان نضع كل سن مع بعضه حتى لا يكون هناك اصابات وحوادث لا يحمد عقباها والحمد لله بدأت اتعافى وتظهر اجنحتى مرة اخرى والحمد لله رب العالمين





امضاء
اخضر ورمادى

والسلام عليكم ورحمة الله وبركاته

[احمد فتحى]

مشرفنا العزيز استاذ احمد قصه رائعه جدا مليئه بالنصائح
و اسلوب مميز فى العرض بارك الله فيك

[amrnour]

تسلم يابو جميله والله بس ممكن تعرفنا ايه هو الطعام الجديد الى جاى من برة ده

[Birds servant]

بارك الله فيك أخي ابو جميلة قصة رائعة،والحوار بين الأب والفرخ ممتع وشيق جدا،وكذلك المعلومات داخل القصة مفيدة جدا ويجب أن ننتبه لها جيدا.

[HOSSAM AHMED]

ما شاء الله قصه رائعه بارك الله فيك اخى وبها العديد من النصائح الغاليه والمهمه







بارك الله فيك اخى ابو جميله وبارك لك فى طيورك

[crest10]

السلام عليكم

شكرآ جزيلآ لك اخي العزيز ابو جميله وبارك الله فيك على القصه الرائعه وكما عوتنا دائمآ متميز بمواضيعك القيمه..

تحياااااااااااااااااااتي

[تيتو 2005]

ماشاء الله قصه جميله واسلوبها اروع فى الكتابه يعنى بجد الواحد يقدر يستفيد بها اكتر وتوصل معلومات بطريقه سهله ومبسطه وياريت بقيه السلسه بهذه الطريقه

[أحمد شلبي]

ايه الجمال ده تسلم ايدك يا ابوجميلة
رائعة جديدة تنضم إلى روائعك لكن هذه المرة أروع بكثير اسلوب حواري رائع
ربنا يبارك فيك وفي طيورك أخي الحبيب طبعاً طيور محترف ما شاء الله

وعلى فكره المفرض تشتغل روائي صدقني هتبقى انجح روائي في مصر

[elgaaan]

جزاك الله خيراً قصة رائعه
حقاً قصة جميلة يا ابوجميلة

[أبو ورودي]

يعطيك العافية ياصاحب الأخضر والرمادي
حوار شيق وهادف وجزيل الشكر لك على تميزك وإبداعك
بوركت جهودك اخوي في ارتقاع المنتدى
اخوك
ابو ورود الزهراني