لحقو علي الله يخليكم ( يا اهل الكواسكو )

[مشاعل الكويت]

السلام عليكم ورحمة الله وبركاته

بعد التحية والسلام :-

عندي كاسكو عمرة تقريبا 4-6 شهور

ورفيجتي عينها حاره لدرجه مو طبيعيه

الظاهر عطته عين

والكاسكو حاشه سهال حاد ...

لما رحت حق الدكتور البيطري ( فلبيني الجنسيه ) قالي ماما هذا موت ما راح يعيش ممكن باجر موت لأنه تعبان حيل الكاسكو

انا رديت البيت بس قمت ابجي

ما اطول عليكم كل ربع ساعه انظف الكاسكو من الماي والاكل وقفص

لمدة اسبوع مع المضاد الحيوي اللي عطاني اياه البيطري ( بودره المضاد الحيوي يعني مو سائل ) اخلطه مع الماي

شفت الكاسكو قام يقدر يوقف على حيله

وقمت اعطيه اكل من ايدي ( عيش مشخول يعني عيش ابيض مخلوط مع عدس + بطاط مفيوح يعني مغلي بالماي + جزر مفيوح + دزه مفيوحه ) طبعا غير الاكل الصحي اللي انا اشتريته له من مستشفى رويال حاص بس حق البغبغاوات ( كاسكو + امازون + مكاو )

وهذي صورة الاكل الطبي



المهم بعد اسبوعين من العلاج والعنايه المكثفه والبجي والدعاء ... اللهم لك الحمد والشكر الكاسكو صار من احسن ما يمكن

الحين الكاسكو ما فيه اسهال اللهم لك الحمد والشكر

لكن الحين الكاسكو بعد المراقبه اتضح لي انه الكاسكو بس يحك جسمه ( صارله الحيم خمس ايام بالضبط الى تاريخ اليوم 22-1-2010 ) وما ادري شنو سالفته

وديته اكثر من بيطري

دكتور يقولي هذي مو حساسيه هذا شي طبيعي

ودكتور ثاني يقولي هذا فيه قمل ( دود او حشرات صغيره ) وعطاني بخاخ سبريه اسمه vogelspray 404 لونه اصفر بأحمر وقالي ما يضر حتى لو الكاسكو لعق جسمه والدواء عليه

وانا استخدمت هذا السبريه ... ومازال الكاسكو يحك جسمه ( استخدمته امس و اليوم )

ودكتور ثالث يقولي فيه حساسيه

ودكتور رابع يقولي ما فيه حساسيه .. لو فيه حساسيه تلقين جسمه لونه احمر مع قشور .. وهذا الكاسكو ما فيه حساسيه وانا اتحدى اي دكتور يقول فيه حساسيه

وقلتله يمكن فيه حاله نفسيه ... رد علي وقالي لو حاله نفسيه كان لقيتي الكاسكو ينتف ريشه ويصير الريش مبعثر ( بالكويتي متعفس ) .

وانا ليلحين قاعده احوس بالكاسكو

الله يخليكم يا اهل العلم و المعرفه

قولولي شنو الحل برايكم ؟؟؟ او شنو مشكله هذا الكاسكو ؟؟

والله صرفت على الكاسكو تقريبا 100 دينار كويتي

وانا ما همني الفلوس .... كل همي الكاسكو يتعالج

الله يخليكم ردو علي ولا تخلوني

ومشكورين

[ESSAM_DOWIDAR]

بسم الله الرحمن الرحيم

اختى الفاضله الصوره غير ظاهره فأرجو اعاده رفعها مره اخرى , من خلال شرحك اعتقد بالفعل ان طائرك غير مصاب الحساسيه وخاصتا ان لون الجلد طبيعى وما يقوم به هو عباره عن عمليه مداعبه للريش والجسم والغرض منها التنظيف عموما وتصفيف الريش بعد فتره المرض التى مر بها وهو امر طبيعى وشائع مع الببغاوات والله اعلى واعلم وبالله التوفيق

[بو نواف]

بسم الله الرحمن الرحيم



السلام عليكم ورحمة الله وبركاته

البكتيريا والجراثيم هي المسبب الرئيس لإصابـة
الطائر بالإسهال
لــذا
لابد من التنويع في الأكل المقدم للطائر والتخلص من
الأكل سريع التلف بعد تقديمة بفترة قصيرة والتأكد من
سلامة حبوب الأكل الجاهزة وتبديل الماء بصورة يومية
والحرص دائماً على نظافة أواني الأكل والشرب
:
الحك عادة طبيعية تقوم به الطيور بقصد
تصفيف الريش وتنظيفه

أما
الحك والإنزعاج مع الحركات السريعة ونفش
الطائر لريشه مؤشر على وجود طفيل على
جسم الطائر
وعند الكشف على جسم الطائر تحت الجناح
وحول الرقبة وعند مؤخرة الجسم عند منبت
الذيل يلاحظ وجود وخزات برأس الدبوس
محمرة أو مزرقة
هنا لابد من معالجة الطائر حالاً وبدون أي تباطيء

بشكل عــام
نظافة القفص والأستحمام المنتظم وتعريض
الطائر للشمس ضمان لعدم حصول مثل تلك
الحالات مستقبلاً

المضادات الحيوية تقضي على البكتيريا الضارة
والنافعة في نفس الوقت
لــذا
لابد من تقديم الفيتامينات لمدة 3 أيام وذلك
لاسترداد العافية ورفع المناعة الطبيعية
أيضاً
لابد من تقديم الكالسيوم السائل عن طريق
ماء الشرب في الأسبوع مرة واحدة

وفــي أمــــان اللــه ورعـــايتـــه



والسلام عليكم ورحمة الله وبركاته

[me-punisher]

بارك الله فيكم الاخوة على الرد على هذه الموضوع وان شاء الله يشفى الكاسكو

بالتوفيق ان شاء الله

[بازوو]

السلام عليكم ورحمته الله وبركاته

اخت مشاعل الكاسكو ان شاء الله انو بخير

من طبع الطيور عندهم هوايه وهي تصفيف الريش

دائما بشكل يومي امر عادي وطبيعي هذا شي عادي

اما للوقايه اهم شي تعريض الطائر للشمس ونظافة القفص وتعقيمه

لكي تختفي اي بكتيريا موجوده وهنالك انواع من البكتيريا لا ترى بالعين المجرده

لهكذا عند التعقيو استخدمي مواد مطهره

وايضا تحميم الطائر كل اسبوع هذا الشي يخليه مليئ بالنشاط

واهم شي اطعامه اطعمه فيها كالسيوم

مثل بيض مسلوق او حليب مع الماي المقطر والمعقم ........الخ

وللالتهابات اعطيه (زبد البحر)اذا متواجد بالكويت .......وهذا كل ما عندي والله اعلم .........

والله يشفيه الكاسكو ان شاء الله........


احمدعمر

[مشاعل الكويت]

الف شكر لكم جميعا

وباجر بأذن الله راح اقولكم شنو صار معاي بالتفصيل الممل

^_^

وان شاء الله يكون الدكتور صادق معاي

راح اجرب التجربه غدا وبأذن الله راح ابلغكم اول بأول

وشكرا لكم جميعا على التفاعل معاي

بالفعل انتو والطبيب البيطري طمن قلبي

^_^

[عبودي البحريني]

أختي حمد لله على سلامة كاسيكو مالج
أهم شي أنه تماثل للشفاء
حك الريش أمر عادي
عليك بإتباع نصائح الخبراء والتنظيف والتعقيم المستمر
أهم شي أن القفص يتعرض لأشعة شمس للقضاء على الجراثيم
ولا تحاتين الحك قد يكون وسيلة للتسلية للطائر في بعض الأوقات

[بوعبيد 31]

السلام عليكم
اول شى الحمدلله ان الطير تشافى من المرض بل من الموت لان هذا المرض صعب علاجه مثل ماقالج الطبيب بس الحمدلله
ثانيا ان الطير اذا يحك جسمه اما فيه حساسيه او قمل او من الاكل وانا اعتقد والعلم عندالله ان فيه قمل وبكتريا لان توه صغير على الحساسيه وانت عليجان ترشين الدواء عليه وبين خلال 3 ايام معاج والحين عندنا الجو بارد وماانصحج تسبحينه بس اذا الجو صار مشمس حطيه بالشمس وانشاءالله يتشافه
وسلامت الكاسكو

[مشاعل الكويت]

امس وانا في البيطري كلمني شخص عن الكاسكو اللي عندي

واتضح الكاسكو اللي عندي ما سبحته اكثر من شهر ونص ( علشان الجو بارد جدا ) .

وقالي الرجل المسن بالعمر امس

باجر اذا صار الجو مشمس ودافي ... سبحي الكاسكو عن طريق البخاخ

بس بشرط انه يكون الجو مشمس ودافيء ( يعني في حراره اكثر من الدافيء بنسبه قليله )

وخليه بالشمس حتى ينشف ودخليه علشان لا يحترق بالشمس

وانا اتبعت التعليمات والحمدلله الكاسكو افضل ما يمكن

شاكرة لكم جميعا على التفاعل معاي والوقوف بجانبي

الف شكر لكم

^_^

[الكاسكووووو]

السلام عليكم /

اختي مشاعل الحمد الله على سلامة الكاسكو ولو متاخر سمعي حبيبتي تري موكل شيء يقوله البيطري الفلبيني اللي في الكويت صحيح لانه نفس الشيء قالي حق كاسكوي انتي زين انا صارت فيه حاله نفسية قولي المرض يتشافه بعد اذن من الله لكن الحاله النفسية اشلون صعب بس الحمد لله قالي هذا الطير ريشه تنتف ما يرد مثل ما كان بس مع الدواء 30 بالميه قلت ميخالف الله موانت رحت البيت واعتنيت فيه وايد والحمد لله صار مو 50 بالمية صار 100 المية ولا فراخ الجمعية
يمكن طيرج صار يمكن اشوي حساسية من نوع من الاكل بس شيء طبيعي جدا انه يحك ريشه وينظف المهم ان الريش مايطيح منه وايد ويكون مكانه اقرع يعني الجلد امبين اذا بين الجلد اهني مصدر الخطر .


بالتوفيق ان شاء الله والله طلعتي خووووووش طبيبة بيطرية ممتازة

بالتوفيق ياشعلولة

الكاسكووووو